انا اسفة ليك يا شهيد

اسفة لكل شهيد راح وحقه مجاش

اسفة لأني في يوم نمت وقلت خلاص

اسفة عشان انا خنت وبعت كمان ببلاش

اسفة عشان انا قلت شوية بس ارتاح

حبة ورق ضايعين ضعت انت وسطيهم

ايات وحبة دباجة وكان اخرهم قلم

قلم على وش اللي عاش وكان فاكرهم امل

والم على اللي مات عشان يعيش الامل

ياللي انت بتقول الحق راح يرجع 

يرجع يا عم ازاي ؟! قولي انت وانا هسكت 

 يرجع بحبة حبر في صباعك ؟!

ولا بعلامة صح ع الخاينين ؟!

اما انت يا ام الشهيد فانا اسفة 100 مرة

انا اللي قلت زمان حقك هيرجعلك

وانا اللي طمنتك وانا اللي صبرتك 

الحق راجع راجع استني بس انتي

والحق راح ولا جاش 

وانت اللي رحت بلاش

لما اتقتلت زمان من الخونة والفاسدين

واما اتقتلت كمان منا احنا 100 مرة 

انا اسفة ليك يا شهيد 

انا اسفة يا ام الشهيد

اسفة لوعد وعدته مش قده

اسفة اني قلت في يوم
"يا شهيد نام وارتاح ... واحنا نكمل الكفاح"

مليون اسفة ومش هيكفي

احساس غريب بالذنب ... كنا اصحاب من وانا عندي 7 سنين بنعمل كل حاجة مع بعض نروح من المدرسة نتكلم باقي اليوم على التليفون وفي الاجازات نتقابل ونروح النادي ، قعدنا مع بعض 8 سنين كاملين بنفس الطريقة لحد ما خلصنا مدرسة في اعدادي  وبعدين كل واحد راح مدرسة تانية في ثانوي .. الفترة دي كنا لسه بنتواصل بس اكيد مش زي الاول، اخر مرة شوفتها كان قبل ما ادخل الكلية من اربع سنين وبعد كده الكلية -العملية- قطعت التواصل خالص، بعد سنة ونص حاولت اوصلها على ال FaceBook وفعلا عرفت بس مكنش فيه كلام اوي،انا طبعا عايشة حياتي مع اصحابي بتوع الكلية اللي تعتبر بيتي الاول مش التاني نظرا للفترة اللي بنقضيها فيها .. كنا بنقعد طول اليوم مع بعض في الكلية ونيجي نحكي اللي حصل ونضحك على الFB بليل .. لحد ما زهقت فجأة فقررت مع نفسي اني اقفل الaccount خالص ومش مهم اي حاجة اهم حاجة اني اريح نفسي وفعلا قفلته سنتين كاملين ومكنتش عايزة افتحه بس حبيت في اخر سنة يبقى التواصل بيني وبين اصحابي وزمايلي في الكلية مستمر لبعد ما نخلص ففتحته الاسبوع اللي فات ... طول فترة السنتين دول كنت بسأل واحدة زميلتي على صاحبتي دي وعن احوالها وكانت دايما تقولي كويسة احنا على طول مع بعض على النت وبنتكلم وفي مرة اخدت رقم الموبايل بس للأسف طلعت كانت غيرته ... اول ما فتحت الFB  ولقيتها كلمتها عل طول، كانت مبسوطة جدا جدا وقعدت تقولي كلام ظاهره يفرح لكن اللي يركز فيه يفهم ان في حاجة مش مفهومة زي " انا ملقتش زيك انتي كنتي فين انتي على طول كنتي جنبي نفسي اشوفك واتكلم معاكي محبتش ولا صاحبت حد بجد غيرك" .. طبعا كان الرد الطبيعي وقتها كان وانا كمان بس انا كنت بكتبه وانا متأكدة انها في مشكلة ...


كلمتها امبارح على التليفون، ولقيتها عمالة تفكرني بمواقف وتفاصيل بسيطة انا ناسياها بس كنت بحاول اتجاوب معاها فيها عشان كنت حاسة انها مبسوطة بيها جدا وفاكراها اكتر من اي حاجة حصلتلها من وقت قريب وقبل ما نقفل سألتها سؤال وانا كنت شبه متاكدة من الرد .. قولتلها هو انتي في حاجة مضايقاكي؟! 
حسيت انها كانت مستنية حد يسألها السؤال ده من سنين ... لقيتها بتحكيلي قد ايه هي مضايقة وقد ايه اتصدمت في ناس وانها جالها انهيار عصبي وكانت عايشة على المهدئات فترة طويلة جدا ولسه مأثرة معاها لحد دلوقتي وانها تعبانة نفسيا جدا وواصلة لمرحلة مقتنعة فيها انها انتهت وانها وحيدة ومفيش حد جنبها، انا كنت متاكدة ان في مشكلة بس مكنتش متخيلة انها واصلة لكده، انا كنت بسمع بس ومش عارفة ارد ولما  قالتلتي ان ربنا بعتني ليها في الوقت ده نجدة سكت !


كان نفسي تعاتبني عشان اقولها اسفة .. كان نفسي تبقى متضايقة مني عشان احاول اصالحها واصلح اللي عملته .. فرحتها بيا دي على قد ما مفرحاني على قد ما محسساني بالذنب زيادة .. حاسة اني لو كنت موجودة جنبها من الاول مكنتش هتوصل للمرحلة دي .. مكنتش هقدر امنع اللي حصل بس على الاقل هقلله واشيل منها ومعاها شوية ..


من امبارح وانا مش مركزة ومن امبارح وانا بحاسب نفسي وبفكر في باقي الناس اللي نسيتهم ..
انا ازاي كنت انانية كده ومش بفكر غير في نفسي ووقت ما زهقت شوية روحت باعدة عن كل الناس كده 
انا ازاي كنت باخد ولسه باخد الكلية عذر يخليني ماسألش عن اللي بحبهم كده 


البوست مش مقصود بيه اني احكي قصة وخلاص ممكن نقراها ونتأثر او حتى مانكملهاش .. لأ انا اقصد بيه اني افكر اي حد هيقراه بالناس اللي ناسيهم او بقاله فترة ماسألش عنهم لأي سبب او عذر هو مقتنع انه ممكن يبقى ليه الحق فيه او مقتنع ان اللي قدامه كمان ماسألش فاشمعنا انا اللي اسأل ... محدش يعرف ظروف حد ومحدش يعرف مشاكل حد والأكتر من كده ان ممكن انت تكون متاكد ان الشخص ده مش محتاجك في الوقت اللي انت ممكن وجودك يأثر معاه جامد في اي حاجة بيمر بيها ...

اسألوا عن اللي ناسينهم بحجة الظروف

just a message ...

الدين من المعاملة الى المظاهر

                          

ده موضوع مشترك بيني وبين واحد صاحبتي كنا اتكلمنا فيه كتير اوي قبل كده بس اول مرة كنا نتكلم فيه او ننشره على الانترنت .. انا هنقله زي ما اتكتب بالظبط من غير تغيير او تعديل ...

في بعض المواضيع و الأسئله التي تصبيني بالحساسيه فلا تترك لي مجال للنقاش.....كنت حابه اني اتكلم فيها بقالي مده طبعا من وجهه نظري المتواضعه و استنادا علي اقوال علماء أجلاء و هذا من أجل النقاش

أولا: انا لاحظت و خصوصا في الفتره الأخيره ان في الكليات أو غيرها أن معظم الشباب أطلقت لحاها و أرتدت البنطال القصير و أحيانا الجلباب ...أنا مش ضد ده..في الأول و الأخر ديه حريه شخصيه ..بس هل ده فعلا سنه ؟؟!! انا حابه اني أرد من مقطع مبدع قرأته للراحل مصطفي محمود من كتاب " الاسلام السياسي و المعركه القادمه"

[ هو الكلام الأصولي الذي يروج له السطحيون و المتاجرون بالدين الذين يتعاركون حول اللحيه و النقاب و الجلباب و يتركون لب القضيه ليغروقونا في قشور و مظهريات...أن اخلاقيات الاسلام و قيمه هي القضيه ..أن تكون لنا أخلاق هؤلاء المسلمين الأوائل و ليست القضيه ماذا نلبس علي رؤوسنا و ماذا يكون طول الجلباب و لون العباءه ؟!......انما القضيه ماذا يكون في داخل رؤوسنا و ماذا يشغل عقولنا و قلوبنا و كيف نفكر و بأي روح نعمل ؟؟!!
أن النبي عليه الصلاه و السلام كان يأكل بأصابعه و كان يقضي الحاجه في الخلاء و كان يركب البغله في تنقلاته , و كذلك كان يفعل أهل ذلك الزمان مسلمين و كفره..فقد كان ذلك العرف....و تقليد النبي في هذه الأشياء ليس من السنه ..انما السنه أن نقلده فيما أنفرد به و تمييز..وقد تمييز بمكارم الأخلاق...فقال له ربه..و انك لعلي خلق عظيم...لم يمتدح ربه لباسه و انما امتدح خلقه...و هنا مناط الأسوه و التقليد و السنة..أن نقلد النبي في أمانته و صدقه و في كرمه و في شجاعته و في حلمه و ثباته علي الحق .
أما أن نترك كل هذا و نقيم الدنيا و نقعدها علي تقصير الثوب و يقول الواحد ما أقلد و لا أفكر ..فأقول له: بل تفكر ...فالتفكير في الاسلام أكثر من سنه...التفكير فرض..في اختلاف الليل و النهار و في الابل كيف خلقت و في السماء كيف رفعت و في الأرض كيف سطحت و في الجبال كيف نصبت ...و هم ينظرون كيف خلقوا و مم خلقوا ..فاذا جاء ذكر الثياب في القرأن فيقول ربنا " وثيابك فطهر " فالنظافه كانت نقطه لفت النظر...و تقصير الثوب لم يعد يعني في زماننا أي شئ...و انما اطاله الثوب رمز خيلاء في الماضي فان الناس تختال بالقصور و اليخوت و لا احد يختال بجلباب طويل,,,تلك رموز فقدت معناها..و في النهايه لن يوحد تقصير الثوب العرب و لن يضفي علي لابسيه تواضعا و لن يكسبهم خلقا اسلاميا] .

حاسه ان الرد كان طويل شويه ..بس ده ميجيش حاجه جنب اللي لازم نقرأه عشان نمشي علي خطي صحيح من العلم و الأيمان

نيجي لتاني حاجه
ثانيا: ما سمعته عن فرض قانوني قطع يد السارق و النقاب
في نفس الكتاب برضه أبدع مصطفي محمود في أبداء وجهه نظره و أنا برضه مش ضد القوانين ديه بس هو ربنا مش أدنا عقل نفكر بيه تعالوا كده نشوف ايه اللي قاله

[ "قل اعملوا فسيري الله عملكم " و تكرر الأمر بالعلم و العلم و مكارم الأخلاق و التقوي و العدل و الرحمه و البر و العفو ألوف المواضع في القرأن , فنسوا كل هذا و لم يذكروا الا ايه الحجاب التي جاءت في موضع واحد فزايدوا عليها و جعلوها نقابا و قفازا....و ايه قطع يد السارق التي جاءت في موضع واحد فجعلوا منها هدفا أول مع أنها معلقه علي شروط...هي المجتمع العادل و العداله في توزيع الثروة..وهي شروط غير متوافرة في مجتمعات اسلاميه فقيره تسف التراب و يركب أكتاف أكثرها أفراد و أحزاب ينفردون بالمغانم و أكثرها يعيش في مجاعات و حروب يستحيل و لايجوز فيها تطبيق هذا الحد , فما قطع النبي و لاقطع عمر بن الخطاب يدا في حرب و لا مجاعه..ثم من يقطع يد من ؟!! و الكل متهم و كل واحد يضع يده في جيب الأخر ]

نيجي بقي لتالت حاجه و ده سؤال محيرني أنا شخصيا
ثالثا: تقريبا نصف الكليه انضموا لجمعات اسلاميه منها أخوان أو سلفين ...و سبحان الله من النقيد الي النقيد ..انا مش بقول حاجه ربنا يهدي طبعا و بقولها من قلبي ..لكن هو التدين و التقرب لله مينفعش الا لما تنضم لجماعه اسلاميه ...لو فعلا انتا تبت و اتخذت طريقا لله يبقي بينك و بين ربنا ..ربنا دعنا للتأمل و للقراءه و للعلم و ليس للأصغاء لهذا و ذاك و الانضمام لجماعات و اللي بتستغل للاسف ضعف شباب حصلتلهم ظروف سيئه في حياتهم أو كانوا مغيبين طايشين معندهم فكره عن دينهم و ترسخ في عقولهم بعض المفاهيم الخاطئه ...ديننا دين يسر و ليس دين عسر ...يجب ألا نفرض علي انفسنا ما يقوله الغير و لكن ما تفرضه علينا عقولنا.

أخر حاجه و ده موضوع الموسم : الرجوع ل "عصر الخلافه " نريدها حكما اسلاميا:
انا مش بعارض ان يكون حكم اسلامي ..لكن ليه ميكونش اسلامي و علمي في نفس الوقت..زمان في عصر الخلافه الأسلاميه كانوا بيختاروا القائد علي قدر فروسيته و قدرته الحربيه و القتاليه و حكمته و هذا لما تفرضه قواعد هذا الزمان ....لكننا الأن في عصر التكنولوجيا و الطائرات و الصواريخ و هناك مايسمي بجيش يحمل تقنيه النانو و هو جيش وهمي فسيغزون أرضنا دون ذرف نقطه دماء واحده منهم...ألا يستحق هذا التفكير و لو للحظه اننا نحتاج من قادر أن يؤسس تلك الدوله علي أسس علميه ..حينما قرر اليهود أنشاء دوله أسرائيل ..اتعرفون لمن ذهبوا أولا ليبنوا دولتهم ..ذهبوا لأينشتاين ..يجب علينا أن نفكرا جيدا في خطواتنا القادمه.

علي فكره أنا لا بعمل فيها شيخه أو كاتبه أنا حابه أني أصحح مفاهيم خاطئه فقط ..و ده رأي شخصي قابل للنقد و النقاش و دمتم سالمين :D

وده كان ردي تكملة للموضوع 

هضيف بس حاجتين سمعتهم بودني في الكلية بما اننا فتحناه .. ممكن تكون حاجات بسيطة بس بتوضح كتير من طريقة التفكير اللي واصلها الناس دي -مع احترامي ليهم اكيد- 

اول حاجة ان عيد الميلاد بدعة ومفيش حاجة اسمها عيد الام اسمه يوم الام لأن الاعياد اللي اتذكرت في القرأن هي الاضحي والفطر ... ده على اساس ان اللاب توب اللي الولد كان شايله وهو بيتكلم ده اتذكر.
والحاجة التانية بنت بتسأل ولد انت انتخبت مين ؟ والرد كان "الدقن دي تجيب ايه؟!" البنت بتقوله حزب النور ؟ قالها لأ حرية وعدالة ... لأ فالح اوي والله ده لو كانت جابت القناة التالتة كان هيبقى احسن.
وبعدين انا كنت لابسة بنطلون ساعتها ايه بقى حضرتك ممكن تشوف البنطلون ده يجيب ايه ؟ ميلودي مثلا ؟!

الدين اللي المفروض "معاملة ونوايا" بقى بالدقن و لفظ الكلمة ها اقول يوم ولا عيد؟! وكأن نيتي هتختلف من عيد ليوم مثلا وكأن يوم عيد الميلاد ده بيبقى دعوة للفسق والفجور والمعاصي مثلا وكأن اللي ماشي من غير دقن او لحية ده خرج من الدين وتعاليمه مثلا ... لطفك بينا يارب

نسيت اقول كمان على مناقشة كده كنت بقراها على النت مع حد من الكلية وبعد حوالي ساعة دخل واحد يقول "يا جماعة الدين والاخلاق اهم حاجة" ... كلامه صح اكيد بس اللي مش صح هو المكان، المناقشة كانت بعيدة كل البعد عن الدخول في الدين والاخلاق اصلا وبعدين رأي حضرتك يُحترم بس ايه الجديد فيه ؟ حضرتك جاي تأكد على حاجة مُسَلم بيها بغرض الShow وخلاص ولا اصلا من الاول انت مش فاهم في ايه فقلت يلا اهو كده كده اللي هقوله مش غلط ؟! 

وفي الاخر برضه هعيد جملة رنا ... انا ولا بعمل فيها شيخة ولا حاجة ده رأي شخصي يحتمل الصواب والخطأ وقابل للنقد ..

كارثة ومش حاسين

صورة قبل دخول القرية بنص ساعة تقريبا

عارفة ان البوست طويل شوية بس لو سمحتوا اقروه للأخر وانا كبرت الخط عشان يسهل القراءة.

من 9:30 ل 1:05 في الطريق اللي انا عمري ما شفته قبل كده ... اخر حاجة كانت بتدل على وجود حياة كان قبل ما اوصل بساعة ونص وكانت لوحة مكتوب عليها حلوان بعد كده دخلنا على طريق صحراوي مالوش اي معالم ولولا ظهور الجبال في بعض الاوقات انا كنت افتكرت اننا مش بنتحرك وثابتين في نفس المكان. 
وصلنا قرية معرفش اسمها ايه ولا اعرف تابعة لمحافظة ايه .. بس اللي سمعته انها تبع حلوان رغم بعدها ساعة ونص عنها ورغم الطريق المقطوع اللي ما بينهم ده 
اول لما وصلنا صلينا في مكان مش عارفة هو عبارة عن مسجد ولا ايه بالظبط ... هو بيت صغير كده دور ارضي واول بس، الدور الارضي صلي فيه الشباب واحنا صلينا فوق.. المكان عبارة عن اوضه فاضية فيها سجاد بس شكله ماتكنسش من سنين.


بعد الصلاة اتقسمنا مجموعات ... انا كنت في مجموعة المسنين ، دخلت 14 بيت عرفت فيهم معنى الفقر الحقيقي وعرفت يعني ايه تبقى على بعد 3 او 4 ساعات من العاصمة ولسه في بيوت معندهاش ميه وكهربا .. والله دخلت بيت- او اوضه او ممكن عشة- مفيش فيه مية وكمان قاعدين على لمبتين جاز والارضية عبارة عن طوب وزلط يعني حتى مش رمل عشان الواحد يقدر يمشي عليه ده غير ان مكان البيت بيأكدلي ان المسنة اللي فيه مشافتش الناس والشوارع من سنين ... احنا كنا ماشيين على رجل واحدة تقريبا من ضيق الممر اللي بيوصل البيت وبيفصل بينه وبين ممر صرف مية الري وواحدة معانا وقعت 3 مرات من صعوبة المشي والاتزان عليه .
ودخلت بيت كان كل طموح المسنة اللي فيه راديو عشان تسمع اذان الفجر فيه وكمان يسليها عشان مش معاها حد ودخلت بيوت من غير سقف، كل اللي بيفصل بينهم وبين السما حبة قش مرصوصين جنب بعض معرفش بيبقى ايه نظامهم في الشتا.
وبيت دخلته لقيت في حنفية قلت اغسل ايدي من التراب اكتشفت ان الحوض من غير مواسير وان المية بتقع في برميل اعتقد بيفضوه كل شوية وعرفت كمان ان في ازمة الغاز دي الانبوبة عندهم لما بتفضى بشيلوها لمكان تاني بعيد اعتقد المخزن ويسيبوها ويرجعوا بعد "15 يوم" ياخدوها مليانة ... 15 يوم من غير غاز يعني مش كفاية مفيش مية ومفيش كهربا احيانا لأ وكمان مفيش غاز 15 يوم لو انبوبتك فضيت.



مش عارفة ازاي دي قرية تابعة لحلوان يعني تابعة للقاهرة الكبرى ومستغربة جدا لما دي حالها كده امال قرى الصعيد اللي ليل نهار يتكلموا عن فقرها في التليفزيون تبقى عاملة ازاي ومش عارفة ازاي بجد احنا عايشين ومش حاسين بالناس دي كده.
وبحسد الناس اللي شفتهم على رضاهم وعزة نفسهم .. كلمة الحمد لله كانت سابقة كل كلامهم والعزومة على شاي او حاجة ساقعة -رغم تكلفة الحاجات دي بالنسبة ليهم- كانت طالعة من القلب في كل بيت دخلته.



شفت حياة غير ادمية وشفت ان الحاجات اللي احنا بنعتبرها اساسيات في حياتنا واكبر مثال على كده اللاب توب اللي بكتب منه دلوقتي واللي محدش فينا يقدر يستغنى عنه في يومه تمنه ممكن يعيش اسرة منهم سنة على الاقل.
شفت ان الطموح راديو بس مش LCD  او اشتراكات ال Showtime اللي لما بتخلص بنضايق على حلقة المسلسل اللي هتضيع وان النت لما بيفصل يوم بنبقى هنتجنن وكأن العالم هيقف.
شفت ناس مش بنشوفهم حتى في التليفزيون ... عرفت يعني ايه 40% او اكتر "تحت خط الفقر" وعرفت يعني ايه اصلا خط الفقر واللي تحته .
مرض وفقر ونسيان واهمال واهانة واحنا هنا هنموت بعض عشان المرشح "X" يكسب ولا يدخل بس الانتخابات 
ناس مش لاقية تاكل او تتعالج واحنا بنفكر تفتكروا الريال ولا برشلونة هو اللي هيكسب
ناس مش عارفة تشوف من الضلمة اللي عايشة فيها واحنا هنا بنفكر نشغل عمود نور ونطفي العمود اللي جنبه في الشارع وعلى الكباري عشان نوفر كهربا في بلد من اكبر البلاد اللي بتنتج كهربا 
 ناس مش لاقية حد جنبها عشان تشتكيله في الوقت اللي احنا فيه بنتظاهر تضامنا مع الفنانين.
دول الناس اللي بنطالبهم بفهم الحرية والديمقراطية ... دول الناس اللي بنقولهم اختاروا الافضل مش الاغني ...دول الناس اللي احنا بنحاسبهم على جهلهم ونسينا نحاسب نفسنا على جهلنا بيهم.


دي اول مرة كنت اطلع قافلة تبع جمعية رسالة وحبيت انقل اللي شفته هناك عشان نعرف بس احنا عايشين في ايه وحوالينا ايه ...
ياريت كل اللي مجربش الموضوع ده يجربه ... بجد هيفرق جامد معانا ومع الناس اللي هنروحلهم ... كفاية ان بعد كده واحنا بنقول الحمد لله هنبقى بنقولها من القلب واحنا فعلا حسينها وفاهمينها كويس.


اه حاجة اخيرة معلش طولت بس الواحد يقول اللي ليه واللي عليه، الناس برضه هناك مش منسية اوي كده .. لأ في بوسترات مرشحين رئاسة ومجلس شعب وكمان شبكة الموبايل هناك جامدة جدا ... وطبعا احنا عارفين ليه ..

ونحن لم نحلم بأكثر من حياة ... كالحياة* 

محمود درويش

عودة للأي كلام D:

مبدئيا الصور دي بتعبر عني وانا بكتب كود وبعدين استنى النتيجة واتقبلها في الاخر مهما كانت زي ما انتوا شايفين كده بالظبط 

كل حاجة في الدنيا تابعة لقانون الاحتمالات ولو طبقنا القانون ده على حياتنا وتعاملاتنا هنرتاح كتير 

لما ببص على حياتي كده في لحظة عقل اللي هي مش بتيجي كتير بلاقي ان ربنا كرمنى جامد فيها جبت المجموع اللي انا عايزاه ودخلت الكلية اللي انا عايزاها وكمان القسم اللي اخترته حتى ساعات ابقى مش مذاكرة مادة وحليت فيها وحش وانجح وكمان معظم اللي اتعاملت معاهم كانوا كويسين حتى اللي اختلفت معاهم لسه بحترمهم ... بقول الحمد لله بس بخاف دايما من اللي جاي

لسه زي ما انت مفيش اي تغيير حتى لو الظاهر غير كده وحتى لو كله قال العكس 

بحب الورد جدا بس بضايق لما بيبدأ يتدبل ... بفضل شايلاه بس بحاول ابعده عني

الحياه ابسط من اننا نقعد نحسب ونفكر في كل خطوة كده ... لو عايز تعمل حاجة -وانت مقتنع بيها- اعملها اصلا كده كده انت لوحدك اللي هتتحمل نتايجها P:

تيرارارارااااااا ... لأ ده ولا حاجة 

لمحبي النهايات المفتوحة ... ازاي بتدوا لنفسكوا الحق تعملوا كده

زي ما بيتقال ان كلمة حاضر في اوقات كتير بتريح حتى لو في لحظتها بس ... كمان كلمة sorry -مش اسف حتى- ممكن تحل مشاكل كتير رغم بساطتها 

اضحك عليه اه لكن البس T-shirt في ال fun day مكتوب عليه "آساحبي" !! ... كده قلبت على تباع microbus رسمي

سكة ماشية وعمر ماشي ... لسه اجمل يوم مجاشي #منير

نصحية اخيرة ... لو حد متضايق من اي حاجة يروح مسجد الحاكم بأمر الله .. والله راحة نفسية مش طبيعية بجد

انتبه الثورة ترجع الى الخلف .. لأ هي رجعت فعلا وشكلها وقع في حفرة كمان 

لابو اسماعيل ... دخلت الانتخابات خرجت من الانتخابات فانا هفضل انتقدك برضه، صدقني مش قادرة اشوفك غير شيخ من شيوخ الفضائيات وعلى فكرة اللي اقنعك بدخول السياسة ... ظلمك وظلمنا معاه وعلى فكرة تاني كده كده مكنتش هتكسب D:

So alive ^_^

انا واغاني منير والحمد لله حالة من السعادة اللي مالهاش سبب محدد بس يارب تدوم D:D:

على الهامش

-اتكلمت كتيييير مع سهاد "نهر الحب" امبارح وكنت مبسوطة جدا جدا كان نفسي اتكلم اكتر بس قلت كده هبقى رغاية رسمي $:

-بالنسبة للي بيدخل يقرا في صمت  -الكلام ليكي يا منى- عارفاك وهجيبك P:

-واخيرا عملت كارثة جديدة ومستنية عواقبها D: #سترك_يارب