Shocked !!

اما انا لسه واخدة صدمة في حد اعرفه مالهاش حل بجد ... انا وقفت مش مركزة في اي حاجة ولا عارفة اتكلم حتى ولحد دلوقتي مصدومة، عايزة احس ان الموضوع مالوش علاقة بيا و peace وبتاع بس بجد مش قادرة ...
عندنا معيد في الكلية اعتقد مفيش حد مش بيحترمه وبيحبه ... محترم اوي كده وصوته مش عالي وطريقة كلامه كويسة جدا جدا ومن الناس القليلة اللي بتعرف توصل المعلومة بسهولة وكان يدينا وقت في نص السيكشن عشان نصلي ويصلي هو والولاد جماعة  ...
انام ساعة واصحى .. ساعة واحدة والله مش اكتر والاقي النت كله مقلوب على المعيد ده .. طبعا اول حاجة جت في دماغي هو انه اكيد شتم في الثورة ودافع عن حسني مبارك مثلا عشان كده الناس كلها مستغربة لأنه كان من اول الناس اللي جت على الجزيرة في تقرير في الايام الاولى من الثورة بس طلع الموضوع مش كده الموضوع ان المعيد ده اذ فجأة ... اشهر الحاده !!!
مصدومة صدمة مش طبيعية لحد دلوقتي ومش قادرة اصدق اللي هو بيقوله .. عايزة اعدي الموضوع واقلبوا هزار بس هو اكبر من كده بكتير ..
طبعا الانترنت خلانا نشوف ناس كتير من النوعية دي ... الناس اللي مالهاش دين او اللي مش مؤمنة بحاجة كنت بشوفهم واقول ربنا يهديهم كده وانا مش حاسة لكن الموضوع مختلف جدا لما يوصل لحد تعرفه واتعاملت معاه والاكتر لما تفتكر تصرفاته وتحاول تربطها باللي بيقوله دلوقتي وتلاقي ان مالهمش اي علاقة ببعض ...

بالصدفة كنت قريت حديث الصبح وبرضه بالصدفة عرفت معناه وشفته بيتحقق دلوقتي ..
عن عائشة قالت :كان رسول الله صلى الله عليه وسلم يقول ((يا مقلب القلوب ، ثبت قلبي على دينك))
قلت : يا رسول الله ، إنك لتدعو بهذا الدعاء
قال : يا عائشة ، أوما علمت أن القلوب أو قال : قلب بني آدم بين إصبعي الله ، إذا شاء أن يقلبه إلى هدى قلبه، وإذا شاء أن يقلبه إلى ضلالة قلبه . صدق رسول الله صلى الله عليه وسلم .

في ناس بتدافع عنه على اساس انها حرية رأي .. ممكن اقبل حرية الرأي عادي جدا في سياسة في فن او ثقافة بس اسفة انا مش شايفة ان حرية الرأي لما توصل للالحاد ممكن اتقبلها ...

سبحانك يارب ... اللهم ثبت قلوبنا على دينك و اهدهم فانه لا هادي الا انت ...