السبت، 10 مارس، 2012

Why ?!!


ليه دايما الحاجات اللي بنبقى عايزينها تفضل كده من غير تفسير هي اللي بتتفسر رغم ان العكس قليل اوي لو حصل .

ليه دايما الهروب بيبقى اسلم واسهل حل في 90 % من المشاكل رغم ان الفشل بعد المحاولة عمره ما كان غلط .

ليه دايما بنعيش في دايرة واحدة وبنبقى خايفين تكبر مننا ولما نتصدم في حد من دايرتنا بنحس ان العالم كله كده رغم ان لسه في ناس تانية مشوفناهمش ومعرفناهمش بره الدايرة دي وممكن يبقوا احسن من اللي جواها كتير .

ليه دايما بنخاف من التغيير حتى في الحاجات البسيطة، بنمشي في نفس الشوارع ونروح لنفس الأماكن ونسمع نفس الموسيقى حتى لو ابتدينا نزهق او نتعب منهم بنفضل اننا نفضل معاهم على اننا نغيرهم او نكتشف غيرهم .

ليه دايما بنحاول ندور للناس اللي بنحبهم على اعذار مهما غلطوا، ليه مبنملكش الشجاعة اننا نواجه نفسنا بعيوبهم واخطائهم .

ليه دايما في ناس بتحس ان الحزن لايق عليهم اكتر ومش شايفين نفسهم في الفرحة ابدا او بمعنى تاني ليه دايما في ناس بتخاف تفرح .

ليه دايما ممكن الوقت يقف عند حد معين رغم اقتناعنا ان الحياة مابتقفش على حد بس ده كتير بيحصل، بيحصل اننا لما نخسر او نبعد عن حد الوقت بيقف بنبقى عايزين نحركه بأي طريقة بس الذكريات بتمنعه وكتير بعد ما يتحرك بنندم على الفترة اللي وقفها .

ليه دايما في لحظة بننسنا فيها تجاربنا وخبراتنا وبنخوض نفس المعركة من الأول حتى لو شكلها من بره مختلف .

ليه دايما المواجهة هي اصعب حاجة على الانسان رغم انها ممكن تكون اسهل طريق بيننا ليه دايما الخوف او العند او الكِبر بيقفوا بينها ويننا .

ليه دايما بتبقى الصراحة خطوة متأخرة وعشان كده كتير بيصاحبها جرح .

ساعات بحس ان غموض الأسئلة دي واسئلة غيرها كتير هي اللي بتدي الحياة معنى بس في نفس الوقت هي دايما سبب جراحنا ...

10-3-2012
1:03 am

هناك تعليقان (2):

  1. نور حبيبتي
    فيه اسئلة كتييييييييرة اوي ملهاش اجابة
    خالص صديقني
    احيانا كتير بيكون كويس اننا مانفكرش اوي عشان منتعبش
    صدقيني احلي مرحلة لما تسيبي الامور تمشي كدة زي ما ربنا كاتبها من غير ما تسألى وتدوري علي اجابات وسيبي الاحابات توصلك لوحدها ممكن يكون احسن
    :))

    ردحذف
  2. انا مقتنعة اننا مش هنوصل لاجابات ابدا بس المشكلة ان كل سؤال من دول فيه موقف بيحصل معانا كلنا ودايما دايما ينتهي بجرح

    ردحذف