السبت، 28 أبريل، 2012

كارثة ومش حاسين

صورة قبل دخول القرية بنص ساعة تقريبا

عارفة ان البوست طويل شوية بس لو سمحتوا اقروه للأخر وانا كبرت الخط عشان يسهل القراءة.
من 9:30 ل 1:05 في الطريق اللي انا عمري ما شفته قبل كده ... اخر حاجة كانت بتدل على وجود حياة كان قبل ما اوصل بساعة ونص وكانت لوحة مكتوب عليها حلوان بعد كده دخلنا على طريق صحراوي مالوش اي معالم ولولا ظهور الجبال في بعض الاوقات انا كنت افتكرت اننا مش بنتحرك وثابتين في نفس المكان. 
وصلنا قرية معرفش اسمها ايه ولا اعرف تابعة لمحافظة ايه .. بس اللي سمعته انها تبع حلوان رغم بعدها ساعة ونص عنها ورغم الطريق المقطوع اللي ما بينهم ده 
اول لما وصلنا صلينا في مكان مش عارفة هو عبارة عن مسجد ولا ايه بالظبط ... هو بيت صغير كده دور ارضي واول بس، الدور الارضي صلي فيه الشباب واحنا صلينا فوق.. المكان عبارة عن اوضه فاضية فيها سجاد بس شكله ماتكنسش من سنين.


بعد الصلاة اتقسمنا مجموعات ... انا كنت في مجموعة المسنين ، دخلت 14 بيت عرفت فيهم معنى الفقر الحقيقي وعرفت يعني ايه تبقى على بعد 3 او 4 ساعات من العاصمة ولسه في بيوت معندهاش ميه وكهربا .. والله دخلت بيت- او اوضه او ممكن عشة- مفيش فيه مية وكمان قاعدين على لمبتين جاز والارضية عبارة عن طوب وزلط يعني حتى مش رمل عشان الواحد يقدر يمشي عليه ده غير ان مكان البيت بيأكدلي ان المسنة اللي فيه مشافتش الناس والشوارع من سنين ... احنا كنا ماشيين على رجل واحدة تقريبا من ضيق الممر اللي بيوصل البيت وبيفصل بينه وبين ممر صرف مية الري وواحدة معانا وقعت 3 مرات من صعوبة المشي والاتزان عليه .
ودخلت بيت كان كل طموح المسنة اللي فيه راديو عشان تسمع اذان الفجر فيه وكمان يسليها عشان مش معاها حد ودخلت بيوت من غير سقف، كل اللي بيفصل بينهم وبين السما حبة قش مرصوصين جنب بعض معرفش بيبقى ايه نظامهم في الشتا.
وبيت دخلته لقيت في حنفية قلت اغسل ايدي من التراب اكتشفت ان الحوض من غير مواسير وان المية بتقع في برميل اعتقد بيفضوه كل شوية وعرفت كمان ان في ازمة الغاز دي الانبوبة عندهم لما بتفضى بشيلوها لمكان تاني بعيد اعتقد المخزن ويسيبوها ويرجعوا بعد "15 يوم" ياخدوها مليانة ... 15 يوم من غير غاز يعني مش كفاية مفيش مية ومفيش كهربا احيانا لأ وكمان مفيش غاز 15 يوم لو انبوبتك فضيت.



مش عارفة ازاي دي قرية تابعة لحلوان يعني تابعة للقاهرة الكبرى ومستغربة جدا لما دي حالها كده امال قرى الصعيد اللي ليل نهار يتكلموا عن فقرها في التليفزيون تبقى عاملة ازاي ومش عارفة ازاي بجد احنا عايشين ومش حاسين بالناس دي كده.
وبحسد الناس اللي شفتهم على رضاهم وعزة نفسهم .. كلمة الحمد لله كانت سابقة كل كلامهم والعزومة على شاي او حاجة ساقعة -رغم تكلفة الحاجات دي بالنسبة ليهم- كانت طالعة من القلب في كل بيت دخلته.



شفت حياة غير ادمية وشفت ان الحاجات اللي احنا بنعتبرها اساسيات في حياتنا واكبر مثال على كده اللاب توب اللي بكتب منه دلوقتي واللي محدش فينا يقدر يستغنى عنه في يومه تمنه ممكن يعيش اسرة منهم سنة على الاقل.
شفت ان الطموح راديو بس مش LCD  او اشتراكات ال Showtime اللي لما بتخلص بنضايق على حلقة المسلسل اللي هتضيع وان النت لما بيفصل يوم بنبقى هنتجنن وكأن العالم هيقف.
شفت ناس مش بنشوفهم حتى في التليفزيون ... عرفت يعني ايه 40% او اكتر "تحت خط الفقر" وعرفت يعني ايه اصلا خط الفقر واللي تحته .
مرض وفقر ونسيان واهمال واهانة واحنا هنا هنموت بعض عشان المرشح "X" يكسب ولا يدخل بس الانتخابات 
ناس مش لاقية تاكل او تتعالج واحنا بنفكر تفتكروا الريال ولا برشلونة هو اللي هيكسب
ناس مش عارفة تشوف من الضلمة اللي عايشة فيها واحنا هنا بنفكر نشغل عمود نور ونطفي العمود اللي جنبه في الشارع وعلى الكباري عشان نوفر كهربا في بلد من اكبر البلاد اللي بتنتج كهربا 
 ناس مش لاقية حد جنبها عشان تشتكيله في الوقت اللي احنا فيه بنتظاهر تضامنا مع الفنانين.
دول الناس اللي بنطالبهم بفهم الحرية والديمقراطية ... دول الناس اللي بنقولهم اختاروا الافضل مش الاغني ...دول الناس اللي احنا بنحاسبهم على جهلهم ونسينا نحاسب نفسنا على جهلنا بيهم.


دي اول مرة كنت اطلع قافلة تبع جمعية رسالة وحبيت انقل اللي شفته هناك عشان نعرف بس احنا عايشين في ايه وحوالينا ايه ...
ياريت كل اللي مجربش الموضوع ده يجربه ... بجد هيفرق جامد معانا ومع الناس اللي هنروحلهم ... كفاية ان بعد كده واحنا بنقول الحمد لله هنبقى بنقولها من القلب واحنا فعلا حسينها وفاهمينها كويس.


اه حاجة اخيرة معلش طولت بس الواحد يقول اللي ليه واللي عليه، الناس برضه هناك مش منسية اوي كده .. لأ في بوسترات مرشحين رئاسة ومجلس شعب وكمان شبكة الموبايل هناك جامدة جدا ... وطبعا احنا عارفين ليه ..


ونحن لم نحلم بأكثر من حياة ... كالحياة* 
محمود درويش

هناك 5 تعليقات:

  1. آآآآآآآآآآآآآآآآآآه يانور أنت ويوسف إدريس بجد أنتم الأتنين وجعتولي قلبي بجد أنتم الأتنين في نفس اليوم بتتكلموا عن ألم النفس والناس اللي عدبتهم الدنيا..

    للأسف العيب علي المسلمين ..اللي هم لايمطوا للأسلام بصلة..ناس مش لاقية تأكل ولا تشرب ويقولك لازم نركب تكيفات في المسجد عشان نتكيف وأحنا بنصلي..أيكش تولعوا من الحر هو الرسول صلي الله عليه وسلم كان بيصلي في تكيف..يردوا ويقولولك أصل جسم الرسول كان أقوي وبيستحمل عننا!

    ولا شنطة رمضان اللي تعر اللي بيوزعوها علي الناس في رمضان وهم ياكلوا الللحم ويحلو ونسيوا إن رمضان أساسا معمول عشان نحس بالفقير..

    حسبي الله ونعم الوكيل..
    ممتازة يانور بجد أحيكي علي أنك شاركتي في قافلة..
    إنسانة إيجابية وبتعرف ربنا
    ربنا يوفقك يارب دايما في حياتك

    أخيرا بليزززززز شيلي الدقيق الأملائي:(

    ردحذف
    الردود
    1. اااااااه شنطة رمضان دي بجد مهزلة مش عارفة كيسين سكر على كيسين رز مع ازازة زيت وكده يلا هنام وضميري مرتاح وابقى عملت اللي عليا

      على طول كنا بنقول ان البلد هي اللي كده والحكومة هي السبب .. ماشي هما سبب رئيسي لكن ده مايعفيناش من المسئولية اكيد، احنا مشاركين بنسبة كبيرة برضه في اللي الناس دول وصلوله و عشان كده كنت متضايقة بجد لما شفت الحاجات دي :(

      بالنسبة للتدقيق الاملائي والله لو اعرف مكانه هشيله على طول .. بس انتي اول واحدة تقولي عليه :D

      حذف
  2. نور يا نور بيجد انا مش عارفه اذاي كدة
    علي فكرة انا شوفت الموضوع قبل كدة لما كنت بتوه وتطرف لمكان واحنا علي الطرق
    ناس متحسهمش عارفين معنى انهم يعيشوه اصلا
    بس حامدين ربنا ومطالبهم بسيطه

    ان شاء الله في يوم من الايام هشترك في حاجه تابعه لرساله كدهو :)

    بحيكى علي البوست وطريقه سردك يا نور :)

    ردحذف
    الردود
    1. ان شاء الله نبقى مع بعض في قافلة قريب :)

      كويس ان الطريقةاتفهمت انا كاتبة البوست تاني يوم وكنت لسه تعبانة من الطريق واللي شفته وكل حاجة :D

      حذف