الجمعة، 12 أكتوبر 2012

لخبطــــــــــــــة


لخبطة لخبطة لخبطة ... فرح وحزن وبكا وضحك وامل واحباط ... اسبوع من الاحتقان والبرد والكحة تبعه اسبوع وكام يوم مش عارفة عدوا ازاي !!!

يوم الخميس الساعة 1 ميعاد في المعادي وانا لسه الساعة 12:05 في البيت والدنيا بمبي خالص ... مشوار رخم جدا لمقابلة غير متوقعة وانتهى بأسخف خبر ممكن اسمعه في حياتي
نفس اليوم فرح دينا "بنت من الزمن ده" ومقدرش اروح من التعب

يوم الجمعة ميتنج كان المفروض ل40 واحد وانا هخلع بس كله خلع وانا ادبست مع اتنين بس وترتب عليه مسئولية يوم كامل اللي هو السبت

يوم السبت رحلة للفيوم مع الأطفال والمسئولية شبه كاملة عليا وانا ضغطي واطي من اول اليوم .. لعب وجري وتنطيط وغنا وكله بالصداع
نفس اليوم خطوبة سهاد "نهر الحب" ومقدرتش اقول مبروك من التعب

يوم الأحد صاحبتي جاية من السفر وانا واعداها اني اكيد هشوفها لما تيجي ... ترتب عليها لقاء مكنش وقته ولا معموله حساب

يوم الاتنين فاضية ؟! اكيد .. طب ممكن تنزلي للأولاد النهاردة .. اوك

يوم التلات مقابلة مع ناس كنت هتجنن واشوفهم وشايفين بعض بخناقة تقريبا رنا "كلمات من نبع احساسي" ومها My Nut" وطبعا من التعب حسيت اني عكننت عليهم اليوم كله
نفس اليوم صاحبتي زعلانة جدا لأني مخرجتش معاها يوم الأحد فكان لازم اعملها زيارة اصالحها وافهمها اللي بيحصل

يوم الأربع مقابلة مع اصحابي بتوع ثانوي وطبعا مفيش لأ لأني بقالي اربع سنين تقريبا معرفش عنهم حاجة

يوم الخميس في الكلية لأني واعدة صاحبتي اني هكون معاها يوم امتحان المادة اللي كانت فاضلة ليها وماينفعش اجي يومها واقول لأ
نفس اليوم خروجة مش معمولها اي حساب مع ناس مش متوقعة اصلا

يوم الجمعة "النهاردة" ميتنج مرة تانية بتاسكات جديدة ومسئولية اكبر

السؤال بقى ... انا فين من ده ؟! بعمل ايه ؟! ومع مين ؟! وهرتاح نفسيا وجسديا امتى ؟! وامتى هعرف اقول مش هقدر ؟! وامتى هعوض الناس اللي قابلتهم عن تقل دمي معاهم ؟! وامتى هرجع اكتب زي الناس ؟! وامتى هرجع اكمل الكتب اللي بدأت اقرأها ؟! وامتى هعرف اخد اجازة من كل حاجة واي حاجة ؟!

عايزة اكل في ماك واتمشى لحد قويدر واكل ايس كريم كراميل في عز الشتا .. عايزة ادعي تحت المطر .. عايزة اتطرد من الكلية الساعة 9 بليل عشان العمال يقفلوها ويروحوا .. عايزة اقنع نفسي اني كويسة زي ما بقدر اقنع الباقي بكده .. عايزة اتمسك بحلم واعيش عشانه .. عايزة اشوف البحر دلوقتي واشكيله همومي واقوله اني زعلانة منه اوي عشان بقاله كتير سايبني لوحدي كده .. عايزة ابطل اركز في التفاصيل والتصرفات وتحليل الشخصيات .. عايزة ابعد عن كل حاجة واولهم الموبايل والنت .. عايزة ارجع اكتب code ويطلعلي error او exception ماينيمنيش ويخليني اشد في شعري لحد ما احله .. عايزة احضن كل حد زعلته بقصد او من غير واقوله انسى .. وعايزة حد يحضني اوي ويقولي انسي .. انا عايزة اعيش :D

هناك 4 تعليقات:

  1. بصي يا حبيبي
    :))
    اولا مبسوطة اني اسمي مكتوب
    :DD
    ثانيا انتي بتكتبي اهو

    ثالثا
    اللي بيحبوكي حيستحملوا اوي انشغالك عنهم ولو شوية لو مستحملوكيش يبقوا وحشين
    :))

    رابعا بقي
    انا بحبك اوووي اوووي
    وكأنك كنتي معايا علي فكرة

    خامسا
    نصيحة
    ربتي افكارك شوية وحاولي تخلي ولو يوم واحد بس ليكي انتي وبس

    عشان حيجي يوم تقفي ومش عاوزة تكملي من كتر الحاجات اللي بتعمليها

    سادسا
    بحبك اوي انا
    :))

    ردحذف
  2. اولا ليا الشرف ان اسمك مكتوب اصلا يعني :D

    ثانيا مش حساني في الكتابة دي انتي عارفة ان كتاباتي اعظم واعمق من كده كتير :P

    ثالثا مش كله ممك يقدر او يستحمل خصوصا ان الاسبوع ده جه مع كذا مناسبة ومقابلة وحاجة فل يعني :D

    رابعا انا بحبك اكتر اووووووووي بجد وكان نفسي فعلا اكون معاكي او حتى ارخم بالتليفون يومها بس ربنا يسامح اللي كان السبب :D

    خامسا والله حاولت النهاردة اعمل كده ومقدرتش قلت هبعد عن الموبايل والنت وفعلا عملت كده بس جيت على نص اليوم لقيت المكالمات والرسايل مابتفصلش
    وخايفة جدا من اليوم اللي هقف في فعلا واقول مش قادرة لأني مش عارفة ارتاح خالص ولو نص يوم

    سادسا وسابعا وثامنا ,, انا بموووووووت فيكي
    :* :* :*

    ردحذف
  3. يلهوز يلهوز يلهوز
    انا هعمل الاحق للبوست بتاعك اللى مش فاهمين بوستى

    بيجد بيجد ريلي يعنى انا مبسوطه برضوا ان اسمى موجود
    بس منبسطش لسبب وجوده هههههههه طمع يمكن

    معرفش في ايه
    بس وانا بقرأ حاسيت ان نفسي اشوفك مرة في يوم رايق مفيهوش دوشه والمواصلات تمام ونقعد نتكلم وناكل ايس كريم ونتمشي في حته فيها بحر واحضنك واحنا ماشين واقولك هتعدى

    اما عن الاغنيه حاسها في الجون بيجد يعنى

    ردحذف
  4. ليه سبب وجوده حلو كمان .. ده انا زعلانة عشان حسيت اني كنت رخمة اوي اليوم ده رغم اني كنت معاكو بعد غياب ومع الايس كريم والنيل فمفيش اجمل من كده

    انا نفسي في كده اووووي ... عايزة هدوء وبحر وايس كريم والاهم من ده عايزة حضن حقيقي يقوللي انسي وسيبك وهتعدي ويبقى بيقولها من قلبه مش كلام وخلاص .. او عارفة يقولها كلام وخلاص وانا هعمل نفسي مقتنعة :D

    بالنسبة للأغنية فانا قلت انتي من الناس القليلة وان مكنتيش الوحيد اللي هتفهميها بجد .. انا حاساها اوووووووووووي

    ردحذف