الاثنين، 22 أكتوبر، 2012

عني وعنهم


وكأنها كانت رسالة كونية .. رسالة في الوقت ده والمكان ده ومن الأشخاص دي .. رسالة بتقول اوعى تسيب حلمك واوعى في يوم تبطل تحلم او تفقد الأمل .. اوعى اي حاجة توقفك واوعى في يوم اليأس ياخدك وبنزل لتحت .. لتحت اوي لدرجة انك ماتشوفش حاجة غير الضلمة والسواد وتقول اكتفيت
احلم واصبر واتأكد ان الحلم هيتحقق بالعمل والاصرار وقبلهم الثقة في الله ... احلم

*************

شعور غريب كده لما تحس انك قدوة لأطفال ولما تعرف انهم بيستنوك من اسبوع لاسبوع وتاخد بالك من كل كلمة بتقولها قدامهم عشان عارف انها هتأثر فيهم بشكل او بآخر والجميل بقى لما تحس انك المفروض ربنا جعلك وسيلة لتحقيق احلامهم ... احلامهم اللي ممكن كتير يفتكرها غريبة او انها هتبقى بسيطة نظرا لظروفهم بس تتفاجىء بالعكس وتلاقي ان احلامهم زي احلامك ويمكن اكبر واجمل ... حلو اوي لما تسأل واحد فيهم عايز تبقى ايه ويقولك ابقى زيك بتحس بفرحة ومسئولية في نفس الوقت .. فرحة انك في وقت قصير قدرت تخليهم كده ومسئولية انك تكون في حلم واحد وطموحه وانك المفروض تنجح عشان نفسك وعشانه .. عشان يتأكد انه كان صح ومغلطتش لما اختارك

*************

شعور زفت لما تركب حاجة وتندم انك ماشتريتش مية وعصير وكام ساندوتش بالمرة عشان قعدتك هتطول وممكن تجوع وتعطش ... للمرور المصري العظيم والشوارع والطرق الجامدة جدا ماينفعش ارجع من مصر الجديدة لحدايق القبة في ساعتين وربع صدقني ... ارجوك كُن رحيماً ... ولسواقين التاكسي الأبيض الشرفاء .. والله انا بركب التاكسي ده اولا للتكييف ثانيا للسرعة ثالثا للعداد فمش كل ما اديكوا فلوس تعملوا عبط وتمشوا من غير ما تدوني باقي .. عشان بتخنق بسرعة الله يكرمكوا

*************

تقوله فاكر يرد لأ .. دي قسوة ولا مكابرة ؟! ... لأ استنى مش عايزة اعرف .. اصل السؤال دايما هيفرض اسوأ الاحتمالات لكن الاجابة هتفرض اعذار وانا مش هدي لتفسي فرصة اختلاق اي اعذار تاني مهما كانت الأسباب
وبعدين عادي برضه هعتبرها رسالة كونية جديدة .. بس المرة دي الرسالة بتقولي "كفاية"

*************

حلو اوي احساس ان الناس بتحبك ... حلو اوي انك تصحى على رسالة غير متوقعة مكتوب فيها اسمي وجنبه "بحبك اوي" ... حلو اوي لما تحس ان الناس شايفاك صح بالحلو والوحش بتاعك مش هتفرق المهم انهم شايفينك صح ... حلو اوي لما تحس ان في ناس بتتمنالك الخير من قلبها بجد مش كلام .. بتفرحلك بجد مش تمثيل .. بتشوفك تبتسم ابتسامة صافية زي نفوسهم ... وبتسمع صوتهم تلاقيه بيضحكلك ... حلو اوي لما تفكر وتلاقي ان لسه "فيها حاجة حلوة"
ولكل واحد حسسني بكده .. انا بحبكوا جدا وفخورة بجد ان ربنا حطكوا في طريقي وعرفتكوا رغم المسافات اللي بيننا


هناك 14 تعليقًا:

  1. اهئ اهئ اهئ

    واحده تفرح وتضحك والتانيه مآسي

    نو كومنت

    اصلك جايبه من الاخر

    :*

    ردحذف
    الردود
    1. رنااااااااااااا والله مهما وصفتلك انا فرحانة ازاي مش هتصدقي

      عارفة اني كان نفسي اكتب البوست ده اوي وبالطريقة دي وجت الظروف كملت وكتبته فعلا .. بحس بعد النوع ده من الكتابة اني خرجت كتيير اوي من جوايا

      المهم سعيدة انك موجودة عندي اخيييرا بجد

      حذف
  2. هى رنا قالت المفيد
    لا تعليق
    بس حاولى تقفى على احساس ثابت , حاسك بترقصى بين الحزن و القلق والفرحه
    عموما كل سنه وانتى طيبه يا نور
    :)

    ردحذف
    الردود
    1. اولا وانت طيب وبخير دايما

      ثانيا بقى انا مش عارفة والله ازاي البوست طلع كده والغريب انه مكتوب في وقت واحد .. بس انا ارتحت كتيير بعديه والاحاسيس دي كلها اتكومت على بعضها كده قدامي فقلت ارميها هنا .. المهم نورت اكيييد

      حذف
  3. انتى خرجتى جزء من اللى جواكى ودة المهم
    وانا كتبت نفس التعليق دى عليكى عندى قبل ما اقرأ دة
    انا ابتديت اقلق

    ردا على كومنتك على الفيس ايوة عندك حق
    واللى بعته آمن فعلا لانى فاتحه عندى
    بس لانى بعته لاكتر من حد
    الفيس قالي في حد وبتاع كده كلام كتير
    المهم مبقتش اعرف اعلق ولا اعمل لايك ولا ابعت رسائل لبعض الايام :)

    ردحذف
    الردود
    1. وانا كمان بقى قلقت :D

      فتحتــــــــــــــه ... حلو اوي
      بالنسبة للفيس تلاقيكي بس عديتي ال limit
      هو جاي في وقت رخم بس اعتقد مش بيكمل يوم واحد الموضوع ده

      حذف
  4. انا بقي مش عارفة اقول ايه غير اني بحبك اوي
    :)

    وكل سنة وانتي منورة حياتي وحياة الناس بجمال قلبك
    مممممممم

    علي فكرة انتي تستاهلي بجد تبقي قدوة للاطفال وانهم يتمنوا يبقوا شبهك
    ووبس

    ردحذف
    الردود
    1. واتا بحبك جدااااااا ومبسوطة اوي اني سمعت صوتك اخيرا

      كل سنة وانتي احلى واجمل بطيبتك وصفائك :))

      حذف
  5. صباح الغاردينيا
    تفاصيل جميلة لانها بيننا وبينهم
    كل عام وأنتِ بخير وسعادة وحب يارب "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
  6. كل سنة وانتي طيبة وسعيدة دايما :))

    ردحذف
  7. حلو البلوج ده
    مع اني ف العادة بكره اللون الاسود

    بس انا انبسطت
    وتفائلت ان فيه ناس بتحلم لسه ، ومؤمنة بالاشارات الكونية
    نفسي كمان افضل مؤمنة بيهم :)

    يسعد صباحك/مساءك

    ردحذف
    الردود
    1. لا اطمني لسه في ناس بتحلم ولسه في ناس بتسنى الحلم يتحقق ولسه في ناس بتتابع الاشارات الكونية بس بتحاول تركز مع الحلو منها بس :)

      صباح الفل

      حذف
  8. انتي نور بمعني الكلمة لانك فعلا كنت محتاجه كلامك ده جدا في الوقت ده بالتحديد

    ردحذف
  9. اولا اصلا يعني مبسوطة انك قرأتيلي :d

    ثانيا بقى انا مش عارفة البوست ده بجد طلع ازاي بالشكل ده من ساعتها وانا مش عارفة اكتب تاني .. كان طالع من جوه اوي يعني :D

    ردحذف