السبت، 10 نوفمبر، 2012

عن اسبوع مضى


قلتلها تحضني ... تحضني اوي .. هي مكنتش فاهمة حاجة كانت بتعمل اللي بقولها عليه وبس مكنتش فاهمة انها بتديني كتير بالحضن ده من غير ماتحس مكنتش تعرف اني بحاول اخرج جزء من الطاقة السلبية جوايا بإني ابدلها بطاقة ايجابية من حضنها مكنتش حاسة قد ايه انا محتاجة حضن زي ده .. حضن يقولي انتي مش لوحدك .. لسه في ناس موجودين حواليكي .. لسه في ناس جنبك اوي وهيعملولك اللي انتي عايزاه حتى لو مش فاهمين

قالتلي اني برضي الناس على حساب نفسي .. عرفتني في جملة من 6 كلمات رغم بعدها عني ... فهمتني اللي مكنتش فاهماه واللي لما فهمته معرفتش اعمل غيره رغم الألم اللي بيسببه في اوقات كتير ورغم الضغط النفسي اللي كتير بيبقى اقوي من اي ألم ملموس تاني

عايزة اشقلب دماغي وافضيها وبعدين اعدلها تاني ... لازم افضيها من الكراكيب اللي ملهاش لازمة وبعدبن اعيد ترتيب كل حاجة في مكانها الصح حسب الأولوية والوقت واسيب جزء كده احتياطي فاضي اهرب ليه في اي وقت من اي حاجة يبقى جزء محدش يعرف عنه حاجة وهو كمان مايعرفش عنى حاجة عشان وقت ما ألجأله مايسألنيش انا جاية ليه ومايعاتبنيش على اي حاجة حصلت او عملتها ياخدني كده زي ما انا ويعملي ريفريش ويرجعني مكاني تاني عشان ابدأ من جديد

قالتلي لازم تاخدي حقك لازم تعرفي ماتخبيش جواكي كده لازم تعرفي توقفي الناس بعد اول كلمة مش عاجباكي .. ماتسبيهمش وبعدين تعملي كده في نفسك ماتديهمش الفرصة انهم يضايقوكي يوم واحد وهما عايشين حياتهم .. قالتلي لازم تعرفي تحبي نفسك تحبيها اوي عشان تعرفي تحبي اللي حواليكي بجد من غير ما تيجي على نفسك .. ساعتها بس هتحبي اللي بتعمليه عشان نفسك هتبقى مرتاحة

ضحكت وقلتلها اني ممكن ادي دروس تقوية في الحب من اول نظرة ده .. وبعدين افتكرت قد ايه انا مش قادرة انسى مواقف اطولهم كان 15 دقيقة وكمان بعتبرهم احسن حاجة حصلتلي .. فكرت ليه ولقيت ان دايما المواقف اللي مش كاملة بتبقى احسن ... القصص اللي بتبدأ بنظرة وتنتهي بنهاية الموقف اللي هو بيبقى دقايق بسيطة دايما بتكون اجمل ... دايما بنفضل فاكرينها وبنبني عليها احلام .. دايما بنبقى حاطين امل ان ده الاجمل ده الاحسن ده الافضل وبيفضل بنفس الصور لأننا ببساطة مش هنشوفه تاني فصورته مش هتتغير في عينينا .. لكن القصص الكاملة دايما بيظهر فيها الجانب التاني .. دايما الوحش بيظهر في موقف ما في وقت ما .. بيظهر عشان يقضي على ايام وممكن سنين ... بيظهر عشان يفوقنا من حلم جميل ويسيبنا مع واقع مليان حزن وألم

وتبقى عودتي للعصبية هي اسوأ ما حدث هذا الاسبوع على الاطلاق .. عايزة اقنع نفسي ان العصبية دي مش بتضر حد غيري يمكن ساعتها بس اعرف ابطلها خالص واريح دماغي زي كتير من اللي بتعامل معاهم

ويبقى الايس كريم هو رفيق الدرب وباعث البسمة على وجهي وسط الظلام :))