السبت، 22 ديسمبر 2012

ما بين الصدمة والأمل


النهاردة الجمعة 21-12-2012 ... صحيت الساعة 8 عشان اجهز سيشن الولاد اللي كنت مجهزة اني هتكلم فيه عن عمر بن الخطاب رضي الله عنه، جهزت مواقف عن اسلامه وحياته وعدله وحكمه 
وصلت الدار الساعة 10 كان المفروض الأول اني هديهم عربي كبديل عن المدرس الأساسي عشان امتحانات كليته قربت ومعندوش وقت .. خلصت السيشن اللي كان قراءة بس وبعدين بدأت سيشن الأخلاقيات والدين بتاعي 

بدأت كلامي بـ 
"هنتكلم النهاردة عن سيدنا عمر بن الخطاب رضي الله عنه .. حد يقولي هو مين كده ؟!"
الأول "نبي ؟!" .. انا "لأ !!!"
التاني "رسول؟! ... انا "برضه لأ .. ايه ده ؟!!!"
التالت "ده هو اللي فتح مدينة ......" ... انا "بـــــــــــــــــــــــــس، كفاية خلاص"
طب سؤال تاني "الخلفاء الراشدين .. هما مين ؟!" ... صمـــــــــــت 
طيب "عددهم قد ايه حد يعرف ؟!!" ... الأول 17 ... التاني 15 ... التالت 7 

مكنتش عارفة اعمل حاجة ولا اقول حاجة وقفت ساكتة وفقت وانا بنادي على المدرس اللي كان معايا برة وقلتله يجي كإنقاذ حتى لو هيقف ساكت اول كلمة قلتهاله "عايزين مدرس دين لازم مدرس دين حالا" .. قالي "في ايه ؟!" .. سألتهم قدامه وقالوا نفس الاجابات حسيته مش عارف يقول حاجة زيي اكتفى انه يقولهم "طب بلاش حد يفتي اللي مش عارف يسكت !!" وخرج وسابني في اسوأ موقف ممكن الواحد يعيشه ... ازاي ناس في سن 10-13 سنة يبقوا كده .. ازاي بنتكلم عن شريعة ودين وتطبيق و صناديق واحنا سايبين النشىء كده ؟!!

مكنش قدامي حل غير اني اقعد قدامهم على الأرض واحكيلهم من البداية من الصفر من اول مولد سيدنا محمد عليه الصلاة والسلام لحد وفاته ويعني ايه وعددهم قد ايه وهما مين وازاي وفين وكل حاجة ... على طول كنت بكون مبسوطة وانا بعلمهم حاجة جديدة بس لأول مرة ابقى متضايقة وانا بحكيلهم متضايقة ان اول مرة يعرفوا المعلومة هيبقى في السن ده وفي الموقف ده وتحت تأثير الصدمة دي 

خلصت السيشن وكان المفروض اروح مع باقي اعضاء الحملة لإستكشاف لحالات الأسر بتاعة الولاد عشان نشوف مين محتاج ايه ,, روحنا المكان ودخلنا البيوت بورق المفروض نكتب فيه الحالة وايه اللي موجود وايه اللي ناقص ... مش هقول اي حاجة غير اني عرفت مين السبب في اللي الولاد فيه !! 
وعلى ذكر سيرة سيدنا عمر .. اتذكر مقولته "لو كان الفقر رجلا لقتلته"* ... بس مش لازم نرمي المسئولية كلها على الفقر .. احنا مسئولين عن اللي الولاد دول وغيرهم فيه .. احنا مسئولين بنسبة كبيرة على عدم الوعي اللي الولاد دول هيكبروا بيه .. احنا معانا حقهم في العلم والمال فبلاش نحرمهم منه تحت اي ظرف بلاش عشان غير انه حقهم فاحنا اللي هنتعب في الاخر واعتقد موضوع الجهل والفقر وعدم الوعي ده احنا بدأنا نحصد نتايجه دلوقتي كتير 

ساعد بأي حاجة .. ساعد بوقت بمجهود بعلم بمال .. شارك حتى بالدعاء 

شكرا لكل اللي ساعدني النهاردة اني اكمل اليوم ده ويعدي على خير .. شكرا لريهام وايات ومصطفى واحمد ومحمود وغيرهم

الدنيا برد ... الحقوهم بالبطاطين ده ايفينت للبطاطين واللبس الشتوي المفروض اننا بنجهزه ليهم ان شاء الله ... بس لما روحنا البيوت لقينا ان اخر حاجة ممكن يفكروا فيها هي البطاطين رغم السقف الخشب اللي هما قاعدين تحتيه 
اللي يقدر يساعد يكلمني او يبعتلي رسالة ... صدقوني هيفرق كتير معاكوا ومعاهم وافتكروا دايما ان الناس دي هي اللي بتدينا مش احنا اللي بنديهم 

المقولة دي يقال ان سيدنا على بن ابي طالب هو القائل وفي اختلاف على كده

هناك 4 تعليقات:

  1. ربنا يكرمك ويقدرك على فعل الخير يا نور ...ولو اني اتضايقت برضه من حدوتة الولاد دول !

    وجاري تشيير الايفنت ان شاء الله في كل حتة اعرفها

    ردحذف
  2. رضووووى .. ربنا يجازينا خير كلنا ويتقبل صالح الأعمال

    ردحذف
  3. المشكلة مش في التعليم وبس المشكلة كمان في الأهالي والمشكلة مش بس في الأهالي لأكمان في المجتمع ككل..ولكن مش معكي أنك مضيقة لأن ربنا أكيد حطك في المكان ده عشان تعالميهم وتفهميهم ..ومش معكي أنك اتصدمتي لأن هو ده الواقع اللي أحنا شايفينه..لا عايشينوه..المهم أنا نقوم بدورنا اللي ربنا حطنا فيه..وربنا يجازيكي كل خير

    ردحذف
  4. بصي انا كنت عارفة انهم مش هيبقوا عارفين مواقف عمر بن الخطاب بس مش لدرجة انه يبقى نبي ورسول والكلام ده ... انا اتصدمت من ان تقريبا الدين عندهم 5% مش اكتر

    واتضايقت من نفسي ومن المجتمع وكل الناس لأني شفت اننا مسئولين عن ده بشكل او بأخر .. حاسة اني مقصرة وكلنا كده رغم ان الموضوع مش صعب

    بس ان شاء الله ربنا يقدرنا ونغير ده لو مش ليهم حتى يبقى لينا لأني زي ما قلت احنا اللي بنحصد ده في الاخر

    ردحذف