السبت، 12 يناير 2013

لملم بقايا الحلم


لما تبقى في مكان المشاكل فيه اكتر من الشغل نفسه يبقى لازم تفكر مليون مرة انك تسيبه، حتى لو كان ادالك كتير حتى لو كان ربنا خلاه سبب من اسباب انه يطلعك من مشاكل كتير ويملى عليك فراغ كبير وحتى لو كان حياتك كلها في يوم من الايام ومكنتش تتخيل او تفكر في انك تسيبه مرة واحدة قبل كده
التفكير في انك تسيبه بيبقى ليه قبل ما يكون ليك .. لما توصل لمرحلة انك مش شايف حاجة غير مشاكل وان كل اللي حواليك شايفينها معاك بس محدش بيتكلم يبقى لازم تعيد التفكير في الناس اللي حواليك كمان مش المكان بس ويبقى لازم تفكر ساعتها هل هتقدر تدي تاني ولا كل تفكيرك هيبقى في المشاكل اللي موجودة وبس
اه ده الحلم اللي كنت بفكر فيه من زمان .. اه ده المكان اللي كنت شايفة نفسي فيه من زمان .. اه دي الحاجة الوحيدة تقريبا الفترة الاخيرة اللي كنت بعملها وانا مبسوطة .. بس انا مش هستحمل اني اعيش في الجو ده اكتر من كده
اهم حاجة لما تيجي تسيب مكان ايا كان، هو انك تسيب فيه بصمتك عشان الناس تفضل شايفاك دايما معاهم وكل ما تفتكرك تفتكر اللي وصلتلته بيهم وليهم .. عشان كده لما بفكر دلوقتي بقول الحمد لله للانجاز اللي تم  لحد دلوقتي الحمد لله اني لو مشيت الناس هتفتكرني كل لما تشوف النتيجة اللي بفضل من ربنا وبمجهودنا كلنا وصلنالها في الفترة البسيطة اللي انا قضيتها معاهم
انا عارفة ان الموضوع مش هيبقى سهل لو حصل وعارفة اني هتعب وهتضايق كتير وهحس بفراغ كبير جدا .. بس اهم حاجة ابقى راضية عن نفسي وعن اللي بعمله في اي مكان انا فيه وده الاحساس اللي بدأت افقده دلوقتي !

واخيرا ...
الحلم مش بيقف على مكان ولا اشخاص، اكيد هلاقي مكان اكمل فيه الحلم اللي بدأته او حتى ابدأ تاني من جديد ... ان شاء الله

هناك 6 تعليقات:

  1. نفس ايلي حصل معايا...بس اهم حاجه تاخدي القرار وهتلاقي حاجه تانيه تشغلك...ربنا معاكي

    ردحذف
  2. لسه مترددة كتير .. قالولي خدي فرصة اسبوعين وكل المشاكل هتتحل بس انا حاسة اني وصلت للأخر حاسة اني بحارب لوحدي رغم انه كل شايف المشاكل معايا ومش بيتكلم .. ربنا يرشدني للصواب

    ردحذف
  3. زي ماقولتلك قبل كدا ماتتنزليش عن دورك مهما إن كان.. وزي ماقولتي الحلم معانا منين لو روحتي:)

    ردحذف
  4. أيوه انا مقتنعة بكده بس نفسي المكان اللي بدأت فيه اول خطوة اكمل فيه للأخر!!

    ردحذف
  5. وده اللي حصلي بالظبط مشاكل مشاكل مشاكل لحد ما مشيت بس عارفة دلوقتي بعرف فعلا والحمد لله اني سبت بصمة وفراغ في ناس كتير ومازالوا بيقولوا فين سهاد وهي بتعدي بس كدة من قدامنا وكفاية انك تمشي من مكان ومع حتي المشاكل الناس تبقي متاكدة انك كنتي علي الحق عشان كدة مقدرتيش
    :)

    وووبس
    ربنا يوفقك بالمكان اللي فيه الخير

    وحشتيني ع فكرة

    ردحذف
  6. ايوه انا افتكرتك بجد عشان نفس اللي حصل تقريبا مشاكل مشاكل وكله شايفها بس محدش بيتكلم غيرك فبتيجي عند لحظة معينة وتزهقي

    ربنا يكتبلنا الخير ويرشدنا الصواب

    وحشاني اكتر بكتير اصلا اصلا اصلا اصلا بقى :*

    ردحذف