الجمعة، 1 فبراير، 2013

من سنة فاتت


زي النهاردة من سنة كنت في معرض الكتاب .. كنت رايحة مش نايمة وتعبانة جدا بس قابلت اصحابي ونسوني التعب وكان يوم اكتر من رائع وفاكرة انه كان برد جدا جدا وفاكرة كمان اني ساعتها مشيت بدري عشان الحق ماتش الأهلي والمصري في بور سعيد 
المفروض كنت انام من كتر التعب خصوصا اني مكنتش نايمة يوم كامل قبلها بس صممت اشوف الماتش وكنت متضايقة ان الأهلي خسر بس قلت ان شاء الله الزمالك يفرحنا ويخسر هو كمان وفي وسط ما انا عمالة ادعي ان الزمالك يخسر واتريق عليه على تويتر لقيت في اقل من دقيقتين ناس كتير بتجري وناس بتتضرب والنور قطع وبدأنا نسمع في ارقام ارواح بتروح من 7 لـ 14 لـ 34 لـــــــــ 74 

اليوم ده من الأيام اللي فرقت في حياتي جدا ... ازاي كل الاحداث دي تحصل بسرعة كده وازاي ممكن واحد يبقى واقف مع اصحابه وفجأة يروح منهم كده وازاي العمر ممكن ينتهي في لحظة فعلا كده 
جالي اكتئاب بعدها، يومين او تلاتة مش بقوم من السرير ومش بعمل حاجة غير اني بقرا اخبار وبس وفاكرة اول خبر قريته تاني يوم الصبح ومش قادرة انساه "الأهلي يتسلم جثث جماهيره" .. فضلت الجملة معلقة معايا مع المشاهد والصور والأحداث نفسها، لحد لما ابتديت افوق شوية واكتشفت اننا تافهين اوي وبنمسك لبعض على الواحدة اوي وان الدنيا ابسط من الي شايفينه ده اوي اوي !!!
لو كل واحد فينا نزل من بيته وهو عارف انه ممكن يموت في اي وقت وممكن مايبقاش لحق يصالح الشخص ده او يعاتب ده ويصافي اللي بينهم او يعدي الغلط البسيط اللي عمله ده وقبل كل ده لازم يكون مسامح نفسه .. الموضوع هيختلف كتير

هناك 10 تعليقات:

  1. دريم
    عارفه انتى ندمت ليه لان التسامح مع شخص لا يملكه فهو ضياع للنفس والروح معا
    الفاروق

    ردحذف
    الردود
    1. دي حقيقة مش كله فعلا بيقدر ويحترم لأن مش كله يملك التسامح

      اشكرك

      حذف
  2. الندم عشان الناس بتخيب ظننا فيهم أغلب الوقت بس في الحقيقة الغلط مش عليهم لكن الغلط علينا احنا، ادامنا حل من واحد بس هو أننا ما ندخلش كل الناس في حياتنا ومنجريش ورا حد هو أساسا مش بيجري ولا يهتم بينا .. والناس اللي تستهل هي بس اللي هتحسي إنك مش بتندمي علي أي حاجة معها وقبل كل حاجة فوضي أمرك لربنا في كل حاجة بتعمليها حتحسي بفرق كبير .. وبجد عجبي جدا كلامك؛)

    ردحذف
    الردود
    1. نفسي اوصل للمرحلة دي جدا .. مش كله بيفهم مش كله يستاهل مش كله المفروض نعمل معاه كده الناس درجات وفي ناس بتغلط من باب الغلط مش لازم كله اختلقله في اعذار

      حذف
  3. لو كل واحد فينا نزل من بيته وهو عارف انه ممكن يموت في اي وقت وممكن مايبقاش لحق يصالح الشخص ده او يعاتب ده ويصافي اللي بينهم او يعدي الغلط البسيط اللي عمله ده وقبل كل ده لازم يكون مسامح نفسه .. الموضوع هيختلف كتير


    أنا عايش بنفس الشكل دا من سنين

    للأسف دا أسلوب حياة
    ودا بيخليني أخد أسوأ معاملة من الناس اللى بيحبوني
    لأنهم فاكريني ضعيف و يا عيني قليل ومستاهلهمش
    أو يمكن لتسليمهم التام بإني هفضل أعاملهم بنفس الشكل وأفضل أعاملهم كويس وأكون سعيد بيهم مهما عملوا

    للأسف أسلوب الحياة دا خسرني كتير

    بس مازلت مصر على الحياة بيه

    لأن الناس مش عارفة إن الحياة قصيرة أوي أوي أوي
    وإن مهما كانت مشاكلي أو ألمي لاز م أخد بالي إن الموت ممكن يضيع كل اللى بحبهم فى لحظة واحدة فقط

    ولذلك
    مازلت حيا
    ومازلت أنا
    ومازلت بتعامل بنفس الشكل
    الحمد لله

    دمتي بكل ود :)

    لن تكون زيارتي الأخيرة ولا تعليقي الأخير

    كوني بخير وتذكري أنهم فى يد الله
    والله أحن عليهم وأكثر رحمة بهم من أمهاتهم

    تحياتي يا عزيزتي
    وتعيشي وتفتكري الخير دايما يارب
    :)
    شاب فقري

    ردحذف
    الردود
    1. وانا كمان عايشة كده وكل كا احاول اتغير ماعرفش لأنه زي ما قلت اسلوب حياة وعشان كده برده ساعات بتتقابل باهمال وسوء معاملة وفهم خاطىء
      بس الحقيقة الوحيدة الواضحة هي الموت والحساب وانا مش هعامل الناس وانسى اعامل ربنا وحسابة خصوصا في زمن الموت السهل والسريع اللي احنا عايشين فيه ده

      ربنا يكتبلنا الخير ... شرفت بتعليقك :))

      حذف
  4. انا اليوم دة مش هنساه كنت في كورس الانجليش وكان عددنا قليل كنا نازلين يوم اضافي الميس حطيته لينا نعمل فيه حاجه
    ووقتها كان ميعاد الماتش وكنا بنتريق على واحد زملكاوى وهو كان بيدعى اننا نخسر
    وبرغم ان اللى حصل دة حصل وانا ليسه في الكورس معرفتش غير لما رجعت البيت الساعه 10 كده
    وداخله لقيت ماما متنحه واختى ومش هنسي جملتها ابدا وهى بتقولى المشجعين ماتو علشان ماتش كورة
    وانا ببص ليها وبقولها مين دوال اللى ماتو يا حجه:(

    انا كمان مقتنعه بكلامك جدا بس التطبيق على كل الناس هيكون زى اذا اطعمت اللئيم تمردا :(

    ردحذف
  5. هو يوم غريب اصلا ومايتنسيش وفيه معاني وتفاصيل وعبر امكبر بكتير من ماتش كورة وناس ماتت

    ايوه اللئيم تمردا دي .. بس المشكلة تعرفي منين اذا كان لئيم او لأ دي بقى اللي كلنا بنقع فيها

    ردحذف
  6. عاوزة اقولك يا نور انه ده كان احساسي بالظبط يومها ومازلت بكتئب لما بفتكر اللي حصل ده
    وقبل عيد ميلادي
    :(

    ردحذف
    الردود
    1. اليوم ده مستحيل يتنسي وزي ما قلت لرنا هو حالة اكبر بكتير من ماتش وموت افراد
      بس عيد ميلادك غير بقى ... كل سنة وانتي اجمل :*

      حذف