السبت، 9 فبراير، 2013

كوني أقوى مما أنت عليه


كيف بامكان الاشياء التي نحبها ان تبالغ في اذيتنا الى هذا الحد ؟!!

ليه دايما الحزن بيجي من الحاجات اللي بنحبها ؟! .. عشان بنحبها اكيد ما الحاجات دي لو مش فارقة معانا يبقى مش هنزعل منها 
لأ انا قصدي ليه اصلا بنتضايق من حاجة بنحبها .. ليه لما بنسأل حد انت زعلان ليه ينبقى متأكدين ان 90% من اجابته هيبقى بسبب حد بيحبه .. ليه بنوصل للمرحلة دي، انا عارفة ان اكيد كل واحد فينا ليه اسبابه بس هو ليه برده الحاجات مش بتفضل حلوة زي اول مرة قابلناها ؟!! 

كانت مبسوطة اوي .. كانت مبسوطة لدرجة تخوف ... والخوف انتصر في النهاية 
كنت بتعلم منها ازاي افرح من غير خوف، كان نفسي تفضل فرحانة للنهاية عشان تديني امل ان لسه السعادة ممكن تستمر وان الخوف مش دايما حليفها وان احنا بس اللي بنحطه في طريقنا بينا وبينها بس الأمل اتهد والاقتناع زاد بأن لا سعادة دون خوف

وبسأل نفسي كتير .. هو احنا ازاي بنبقى شبه بعض كده في الحزن ؟! .. ليه كل لما اقرا حاجة لحد كاتبها بشجن احس ان انا اللي كاتباها ؟! .. وليه دايما احساس الحزن بيبقى عامل زي الريح اللي بتيجي فجأة كده لمجموعة كاملة من البشر مش لشخص او اتنين ؟!

في حاجات كده مهما ضايقتك هتفضل تفتكرلها الموقف اللي عملته معاك، مش هنسى للمكان ده ان ربنا كان خلاه سبب من اسباب كتير طلعتني من حالة ضياع نفسي كبير، ومش هنسى اني عرفت فيه لأول مرة يعني ايه يبقى ليك حلم وتشوف خطوة خطوة منه بتتحقق قدامك، ومش هنسى انه حسسني لأول مرة ان لسه الدنيا فيها خير وان لسه ممكن نقابل ناس مفيش في حياتها حاجة غير انها تحقق حاجة ربنا حطها في المكان ده عشان تحققها وهما مقتنعين ان مفيش غيرهم ينفع لكده عشان كده مهما حصل مش هيسيبوا مكانهم ده لحد تاني
وعشان كده مهما حصل مش هسيب مكاني .. يمكن بس عشان انا دخلت فيه بكل طاقتي ومجهودي فتعبت ويمكن عشان عايزاه يبقى احسن مكان في الدنيا فمش بطيق اشوف غلط فيه ولو بسيط ... بس خلاص هحاول ابعد شوية عن التفاصيل عشان ارتاح واقدر اكمل

في ناس ربنا بيحطها في طريقك عشان تساعدك بطريقة مباشرة او لأ مش مهم بقصد او لأ برده مش مهم، بتقولك ان لسه في حاجات كويسة ولسه في امل في الدنيا وبتقولك اوعى تتكسر اثبت وكمل وقاوم واكيد في الاخر هتوصل ... الناس دي لو جاتلك اتمسك بيهم اوي واعرف كمان ان ربنا بيحبك اوي

قلتلها انا مش سعيدة ومش عارفة ابقى سعيدة 
قالتلي ليه ده انتي حتى لسه صغيرة  ... فحزنت اكتر 



هناك 12 تعليقًا:

  1. أنا أول تعليق
    امممممم
    طيب
    نتكلم بقى

    مبدئيا :
    إحنا مش محتاجين حد يثبت لنا إن الدنيا لسه بخير يا عزيزتي
    ليه ؟
    لأن ربنا سبحانه وتعالي اسمه العادل
    والعدل جاى من التوازن
    يمكن احنا بنشوف الشر او الاذى او الظلم عشان بنركز معاه
    لكن تأكدي إن فى خير فى الكفة التانية بيعادل الشر دا
    مش محتاجين حد يحبنا ويفضل جنبنا يقولنا ان الدنيا خير او يعملنا حاجات حلوة فنكتشف ان الدنيا خير
    يا عزيزتي ببساطة جوا كل واحد فى خير
    المهم انتى هتعملي ايه عشان تشوفى الخير دا ؟؟؟
    التعامل الحذر وعمل الخير للناس

    اولا بقى :
    ليه دايما بنتوجع من الناس اللي بنحبهم
    لاننا ببساطة بنتوقع منهم كتير
    بنحاول نخليهم شبه المسخ اللى فى خيالنا اللى هوا فتى الاحلام او فتاة الاحلام بننسي خالص الواقع
    بنجري عليهم فاكرين انهم خلاص الراحة الابدية اللى هتستمر لحد الموت
    لكن دي مش حقيقة
    يمكن ببساطة الهوا جه سوا فى لحظة مما وخلانا نقدر نشوف انهم حلوين او انهم ينفعونا وهما اللى محتاجينهم
    الاختيار بسرعة وبدون تفكير وتجاهل صوت العقل او صوت الاحساس جوانا ان اللى قدامك مينفعكش او عيوبه صعب التعامل معاها لكن بنجري ناحيته لانه هوا اللى قدامنا او فاكرين انه يناسبنا
    الموضوع مش كدا
    مش لازم نتجاهل الصوت اللى جوانا
    لو الصوت بيقولنا هوا دا الشخص
    اللى هيفضل ويكمل ومش هيتعبنا
    يبقى ساعتها بس لازم نستخدم العقل عشان نحافظ علي الشخصية دي
    لو بيقول حاجة تانية يبقى برده لازم نتبعها
    احنا اللى بنتوقع حاجات كتير
    وعشان كدا أملنا بيخيب وظننا بيخيب برده
    لان اللى قدامك مش ملاك
    بشر وبيغلط وممكن اوي ميبقاش علي قدر توقعاتنا

    ثانيا :
    الخوف شىء جميل لانه بيخلينا فى حالة حذر وبيمنعنا من المخاطرة القوية اللى ممكن تضيع كل حاجة
    لكن فى نفس الوقت مينفعش نسمحله يسيطر علينا
    الخوف ممكن يخلينا نبعد عن حاجات بنموت فيها لمجرد انها ممكن توجعنا تاني
    او يخلينا نهرب من موقف لمجرد اننا فاكرين ان وجعه لا يحتمل
    او يخلينا نقول وانا ليه ارمي نفسي فى قصة ممكن توجعني
    وبيخلينا ننعزل
    الخوف ضروري
    لكن مينفعش يبقى هوا اللى بياخد القرار
    ولا ينفع يبقى المحرك فى حياتنا
    كل الحكاية انه ممكن يساعدنا فى اتخاذ القرار وتقدير الخساير
    ولكن مش يحركنا ويقولنا اعملوا ومتعملوش
    ويخلينا نهرب ونتعب ونبعد

    ملحوظة علي جزء الاكتئاب قبل ما اتكلم فى ثالثا :
    هوا الاكتئاب اللى تعرفيه بيستمر اسابيع ؟؟؟
    اغلب الظن انى لما بكتئب بقعد عالاقل من سنة لتلات سنين
    ومش بسمح بحدوث دا بالساهل
    يمكن اقل فترة مريت بيها فيه كانت حوالى سبع شهور أو تسع شهور

    ثالثا :
    عن المقطع الاخير دا :
    في ناس ربنا بيحطها في طريقك عشان تساعدك بطريقة مباشرة او لأ مش مهم بقصد او لأ برده مش مهم، بتقولك ان لسه في حاجات كويسة ولسه في امل في الدنيا وبتقولك اوعى تتكسر اثبت وكمل وقاوم واكيد في الاخر هتوصل

    إنتي أكيد عارفة انتى عايزة ايه ومحتاجة ايه
    يبقى اتحركي عشانه
    مش تستني حد ييجي يقولك اصل لازم تحاربي
    هيقولك ليه ؟
    هوا انتى مش مقدرة الشىء اللى بتسعي اليه ؟؟؟
    هتستني شىء او شخص يعمل كدا ليه ؟؟؟
    عشان محتاجة صوت تشجيع
    علي صوتك وشجعي نفسك فى وسط الناس اللى بتحبيهم
    انتى قوية لو اعتمدتي علي نفسك
    وقدرتي تواجهي مخاوفك وتتحدي الظروف
    مش تستني تقعي
    اتحركى
    وحاربي وكافحي
    الحاجة اللى عايزاها او محتاجاها مش هتيجي لوحدها لان قوي الشر فى الوجود ممكن تحاربك عشانها او حتي الناس اللى زيك اللى محتاجين نفس الشىء
    ولذلك
    فالمعركة قائمة
    ولابد من تحقيق إنتصار
    إتحركي ومش تقفي ولا تستني حاجة ولا حد يزعق ويقول
    اتمسكي بنفسك

    مش معني كدا انك مش تتمسكي باللي بيشجعوكي
    لكن احتياج زي المقطع دا
    انك تحتاجي حد يعمل دا ممكن يكون خطر علي الحالة النفسية لانه بيخليكي تقربي من ناس اصلا ممكن يكون ليها مصلحة او هدف فى انها تشجعك ولو حتي انها تشوف نفسها كويسة او قوية او ليها ناس بتساعدهم
    فى اسباب كتير
    كوني قوية
    وكوني بخير
    وحاربي عشان اللى عايزاه
    ويارب يبعد عنك كل الحزن او اليأس أو الوجع دا

    تحياتي
    وإلي زيارة أخري وتعليق آخر
    كريم
    شاب فقري :)





    ردحذف
  2. اولا تحياتي ليك ولرأيك واهتمامك بجد

    ثانيا بقى انا عارفة ان الخير موجود في الدنيا اكيد بس الفكرة فعلا في اللي يعرف يلاقيه واللي رينا ييسره ليه في طريقه ... موضوع التعامل بحذر ده بقى هو مشكلتي الاساسية اصلا

    ثالثا حكاية الناس اللي بنحبهم دي صح جدا احنا فعلا بنرفع سقف التمني اللي ممكن يوصل للخيال بس الفكرة ان وي ماالطرف التاني بشر وبيغلط احنا كمان بشر وبنغلط .. ليه ساعات التسامح بيقفبينا وبينه حيطة سد كبيرة وعالية جدا كده

    الاكتئاب اسابيع لأن الدايرة بتلف تاني والقصة بتبدأ في الظهور تاني فالامل يجيي ويروح برده تاني لكن انا الحمد لله اكتفيت سنة ونص او اكتر اكتئاب وبعدين فقت وقلت كفاية

    المقطع الاخير بقى بتاع الناس فصدقني والله وجود الناس حوالينا بيفلرق جامد اوعي تفتكر انك تقدر تكمل لوحدك حتى لو عارف انت عايز ايه واوعي تفتكر ان الوحدة اللي كتير بتمناها دي ممكن حد فينا يقدر يكمل فيها يومين
    في ناس وجودها فعلا في حياتنا بتبقى علامة من ربنا على حبه لينا وبيبقوا شبه الحيطة كده اللي ممكن تسند عليها وقت ما تكون متضايق
    بس بشرط انك تسند عليهم بس مش تعيش بيهم

    مبسوطة بتعليقك جدا جدا ورأيك ووجهة نظرك تحترم جدا جدا جدا ... وعلى فكرة البوست يبان سودوي بس ده شوية فضفضة مش اكتر :D

    ردحذف
    الردود
    1. هرد حاضر علي نقطة نقطة
      أولا :
      موضوع التعامل بحذر ده بقى هو مشكلتي الاساسية اصلا

      التعامل بحذر ممكن ييجي من خلال الصبر
      متمنحش كل حاجة على طول أو أول بأول
      لاء
      خد وقتك وبراحة خالص
      الكلام بميعاد ووقت وكذلك التعامل
      دا طبعا شبه سجن
      لكن التأني أحسن من الدلقة :D
      مع كل الناس حتي الصحاب
      لان فى ناس بقت تعتبر من حقوقها المكتسبة انها تبهدلنا معاها
      وعادي بقي ما احنا هنستحمل
      لانهم خدوا كل حاجة على طول على طول
      :D
      لكن الصبر هوا اللى بيحل النقطة دي لو مفيش حذر
      لازم يبقى فى تركيز فى اللى حوالينا
      كل واحد ليه وايه وبيعمل ايه وعشان ايه
      وطبعا مش تسألي لكن تلاحظي وتفهمي
      وبالنسبة لى قوة الملاحظة بتاعتي بتقدر توصلني لاى شىء عايز اوصله والحمد لله فى نفس اللى قدامي
      بوصل لاي شىء من خلال ملاحظتي وصبري
      :)

      بالنسبة لثانيا :
      يا عزيزتي المشكلة مش فى التسامح
      كتير اللى بيقدروا يسامحوا
      لكن المشكلة فى تقدير التسامح من الطرف التاني
      يعنى الاخر هوا اللى يقدر التسامح دا
      يفهم ان التسامح دا بيدل علي انك بتحبه ومحتاجه ومختاره
      مش بتسامحه عشان انته ضعيف فى حين انك فى عز قوتك تقدر تخليه تراب أو ولا حاجة من كتر القوة
      :D
      المشكلة فى التقدير
      ان اللى قدامك حتي لو سامحتيه مش هيقدرك ولا هيعتبر ان ليكي كرامة او حق اصلا وهيعتبر ان دا حقه المكتسب برده
      :D

      وان اللى قدامك ممكن يكون من كتر ما وجعك خايف يقربلك حتي لو سامحتيه
      بس دا مش موضوعنا دلوقتى :D

      ثالثا : ياعزيزتي الباب اللى ييجي لك منه الريح
      عزل وسيب البيت كله لو حبيت
      مش بس تسده بطوب وحجارة وحواجز
      للاسف فى ناس بتستمتع بانها تخلي اللى قدامها متعلق بيها
      ومن هنا لازم نقفل الباب فى وش اى حد مش يستاهل ونخليه لو عايز الباب يتفتح يتعب بجد
      بجد بجد بجد
      مش يبقى سهل
      دا لو اصلا اتفتح له
      :)

      وعن رابعا
      مين اللى قال مقدرش اكمل فيها يومين فى حين انى عشت فيها سنين وسنين ومنهم تلات سنين بسبب قصة كانت قوية اوي بالنسبة لى

      اما بالنسبة للعلامات من ربنا
      كما تدين تدان
      عامل الناس كويس واقف جنبهم وربنا هيبعت لك ولاد الحلال
      وكمان علي فكرة لازم تعرف هدف الناس دي وتفهمهم قبل مما تحاول حتي تسند عليهم
      :)
      لان فى ناس ليهم اهداف خفية
      ودول انا بتفرج عليهم من بعيد وبضحك
      عشان لو قربت منهم هكشفهم فى لحظة من خلال تعامل
      :)
      وهوصل لعقدهم وساعتها هيضطروا يواجهوا نفسهم
      لازم تفهم اللى قدامك بيساعدك ليه او بيتكلم معاك ليه او بيحاول ليه
      :D
      حتي لو انته واثق فيه ومش باين انه عايز حاجة
      لكن دايما فى حاجة مخفية
      محدش يعرفها
      دا مبدأ
      والحمد لله انا شايف انى بقدر اوصل لشىء زي دا بسهولة
      :D
      انا كمان مبسوط بتعليقي :D
      تخلي عن النظرة السوداوية
      والحياة حلوة ومتعبة وكئيبة ورائعة
      لازم نستحمل الميكس
      لكل حاجة والعكس
      ونشوف كويس
      ونصبر
      ونكون دايما بنتعب عشان نحسن نفسنا
      زي ما بنتعب عشان نلاقى اللى يستاهلنا

      والى رد آخر علي البوست دا أو القادم
      كريم
      شاب فقري :)

      حذف
    2. مش عارفة ليه حاشة من تعليقاتك انك شفت كتير .. كتير اوي كمان ووصلت في الاخر ان مفيش حاجة فارقة في احاجة

      مش مصدقة انك تقدر تعيش لوحدك لسه مش متخيلاها اصلا :D

      والله ما سوداوية اصلا خالص واللي يعرفني عارف كده انا دايما بضحك بس هي الفكرة ان الانسان طاقة في الانهاية ومش هتقدر تعيش في نفس الغط اكتر من مرة وتيجي تضحك تاني وتقول عادي على الاقل هدي نفسي مساحة للغضب اللي انا اصلا بارعة فيه :D

      حذف
    3. هعلق على نقطتين
      الأولي :
      الوحدة
      والعزلة
      سهلة وبتحصل وحصلت كتير وياما إكتأبنا
      عادي يعنى
      مش جديد نتوجع أو نتجرح أو ننعزل أو نفارق أو نتفارق
      مفيش جديد
      انا فعلا شفت كتير أوي والحمد لله وبعتبر نفسي وصلت لمرحلة خطيرة فى المرض النفسي وهوا البلادة يمكن :D
      ((

      لازم نستحمل الميكس
      لكل حاجة والعكس
      ونشوف كويس
      ونصبر
      ونكون دايما بنتعب عشان نحسن نفسنا
      زي ما بنتعب عشان نلاقى اللى يستاهلنا
      ))
      نستحمل ونعيش عادي يعني
      :)

      نقطة بقى الغضب
      نصيحة من مجرب
      إياكي والغضب
      لا تغضب
      الغضب طاقة بتحرق صاحبها قبل ما تحرق غيره
      وبتدمر الإنسان
      فى مصادر تانية للطاقة
      لكن إياكي تغضبي
      هاتي كوباية وكسريها وكسري اى حاجة وفرغي غضبك فى الجري او فى المشي او فى لعبة كمبيوتر او اى حاجة
      لكن اياك تتصرفي علي اساسه
      هاتي عصير ليمون واهدى واقعدي فكري مع نفسك كدا
      وشوفى انتى عايزه ايه وايه التصرف اللى يستحقه الآخر وايه اللى انتى عايزاه
      لكن الغضب عن تجربة لا يفلح

      مبستخدموش غير فى حالات نادرة جدا
      وبتحكم فى عصبيتي وغضبي بعنف لأني عارف اللى ممكن ينتج عنهم

      وعشان كدا ناس كتير بتقولي يا بارد :D
      بس دا عقل مش برود
      دا حب للناس انى مش ءأذيهم
      دا هدوء وتفكير

      متمشيش فى طريق متحددة نهايته من الاول إلا لو كنتى راضية بالنهاية
      لو نهاية ايجابية
      يعني بنتعب سوا عشان نحققها
      يبقى لازم نتعب سوا ونحقق دا براحة كدا
      ونرتب ويكون الاخر ملتزم

      لو نهاية سلبية
      يبقى تسألي نفسك
      يا هلتري الطريق اللى همشي فيه وكل اللى همر فيه يستاهل الوجع اللى هعيشه فىا لاخر
      او عالاقل يستاهل المخاطرة

      ابعدي عن الغضب
      وكوني بخير
      :D
      وانا بعلق تعليقات طويلة لاني باخد وقتي فى القراية وبحب انقل افكاري واتناقش واتواصل مع الناس
      بما انى رجعت اقرا واعلق بدل ما اقرا واجري
      او مقراش خالص
      :)

      كوني بخير
      إلي تعليق قادم
      وإلي بوست قادم
      وكدا يعني
      :)
      كريم
      شاب فقري

      حذف
    4. لأ ولا طويلة ولا حاجة انا بس مستغربة فلسفتك في الحياة اللي بدأت تقريبا اطبق حاجات منها من فترة بدون قصد بس فعلا في حاجات بتخرج عن ارادتنا زي العصبية او النرفزة انا بوصل لمرحلة اللي هو لأ خلاص انا كده جبت الاخر وعلى اللي قدامي يتحمل مسؤلية اللي وصلني ليه .. رغم ان اول حد الغضب والعصبية بيضايقه هو الشخص الغاضب نفسه اللي هو انا :D

      موضوع الوحدة انا جربته سنة ونص تقريبا بس مشبمعناه المعروف .. يعني انا كنت ببقى مع الناش ومش معاهم في نفس الوقت بس اني اعيش لوحدي وانعزل ده اعتقد مستحيل بالنسبة ليا

      في انتظار تعليق قادم على البوست ده او اللي فوقيه :D

      حذف
  3. تحسه تعليق في محله يا اتش والله ... دايما مختلف يابني :D

    ردحذف
    الردود
    1. انا سعيد انك عملتي " :D "
      في اخر الكومنت بتاعك :D

      حذف
    2. يارب دايما سعيد :D

      حذف
  4. ياخوفي تكشفني :) مش هقول اكتر منك
    ا

    ردحذف
    الردود
    1. مين يكشف مين .. مش مطمنالك كده
      المكان هنا امن وسري وبنقول فيه كل اللي احنا عايزينه :$:$

      حذف