الخميس، 13 يونيو 2013

هند ورضوى وانا وكلنا

رضوى ..
كنت دايما وانا بقرالك بحس بوجع خفي .. وجع عايزة تتغلبي عليه فمرة تكتبي عن الناس ومرة تكتبي عن فيلم ومرة عن مشاوير طويلة .. في كل مرة بقرالك بحسك بتهربي مش بتكتبي، حتى بوستات الفرح كان بيبان فيها الوجع .. في كل مرة كنت بقرالك كنت بقول هيجيلها لحظة انفجار ومش هتتحمل اكتر من كده .. كنت بقول ان الهروب هيهرب منها والابتسامة المرسومة هتخذلها
كنت خايفة عليكي اوي من وجع اللحظة دي .. خايفة تنضمي لطابور اللي واجهوا نفسهم بالوجع قبلك ووقفوا فجأة في نص الطريق

هند ..
مش عارفة هتصدقي ولا لأ لو قلتلك اني بحسدك على مواجهتك لنفسك حتى لو كان مواجهة بالوجع وحتى لو كانت المواجهة بتوجع بس انا عارفة كويس ان تمثيل التعافي بيوجع اكتر .. "قولت هنغمس في الوجع لغاية ما اتحرق واموت فاتولد من جديد" انا قلت زيك كده، قلت خليني اتوجع لحد ما اتعب واخد كفايتي منه وابدأ من جديد .. قلت ان طول ما انا بكابر وبعاند وبقول كله هيعدي هفضل واقفة مكاني عشان مهما مثلت على نفسي وعالناس هتيجي لحظة المراية واكتشف الوجع المكبوت عمل فيا ايه وهتيجي لحظات ما قبل النوم وهعرف ان اللي هربت منه طول اليوم جاي يفكرني انه لسه هنا .. قلت اسيب نفسي للوجع ومسيره يزهق من مللي .. بس ولا ملً ولا زهق !

كل اللي بنعمله اننا بنجري .. بنجري ومش عارفين نقف عشان لو وقفنا مش هنتحرك تاني  .. بنجري ورا احلام اخترعناها ورغم بساطتها مابتكملش .. بنتعلق بأطياف الأمل المجهولة .. بنختلق اعذار واهية وبنصدقها .. بنشوف كل حاجة حوالينا رسايل ونفسرها على حسب ما بنتمنى .. بنقف جنب الموجوعين ونقول نصايح واحنا اصلا منهارين من جوه .. بنخاف نعمق العلاقات الجديدة .. بنخاف من الناس وعالناس .. بنحاول نهرب من عيون الناس واسئلتهم فنبين اننا كويسين، بس احنا من جوه مش كده .. وبعد ده كله وبرضه بيفضل هو هو الوجع مابيقلش

هناك 6 تعليقات:

  1. ياريت كان في مسكن للوجع الروح..زي ما في مسكن لأي وجع في جسمك..
    بس عشان تسكن وجعك..افتكر كل حاجة وجعتك..الموقف وكل كلمة وكل حرف وكل إحساس كنت حسوه وقتها..حس بيهم أوي هتتوجع أكتر هتحس إن ضربات قلبك بتزيد..هتعيط وهتصرخ من جواك ألف مرة ..الوجع هيزيد ..ساعتها هتحسه في كل جسمك ..فاهتحس إنك أتخدرت وروحك أتشلت!!

    ساعتها مش هتخف من الوجع..بس هيبقي كل حته في جسمك متساوي فيها الوجع لدرجة إنك مش عارف أيه اللي بيوجعك بالضبط..بس حاسس الوجع متركز في وسط قلبك!!

    والحلو في العياط..إنه بيخليك تنام..وتصحي علي نفس الوجع..بتكل وبتشرب وبتعمل كل حاجة والوجع مضروب في قلبك زي السكينة..اللي محدش عارف يشيلها من قلبك..عشان ببساطة مش أنت اللي ضربت بيها نفسك!!

    ردحذف
    الردود
    1. الأسوأ من ده كله ان اللي ضربك بيها مش عارف انه ضربك اصلا !

      حذف
  2. يرحم روحنا م الوجع .. :( هه

    ردحذف