الأحد، 10 نوفمبر 2013

عن امبارح


امبارح كان يوم التناقضات العالمي  حفل توقيع كتاب شاركت فيه بالصدفة الباحتة

ممكن تشاركي معانا ؟ لأ
ليه كلنا هنشارك ابعتي اي حاجة قديمة .. لأ مش بكتب عشان النشر ومش عايزة ابقى كده
لأ بس ابعتي
بعت اختاروني بلغوني ميعاد الايفينت وبس كده
انتي مش هتيجي ؟! مش عارفة بس ممكن اروح اقابل اصحابي والناس اللي بقرالهم ونفسي اقابلهم من زمان
انتي نازلة النهاردة ؟ اه ... رايحة فين ؟! هروح اقابل اصحابي وهرجع على 6 كده ان شاء الله

ده ملخص للحكاية اللي بدأت من 3 شهور تقريبا وانتهت امبارح لحد الساعة 11:30 قبل ما اقابل رنا
لفينا على المكان ساعة الا ربع تقريبا وكنا زهقانين واعتقد كل واحدة فينا كانت خايفة تبص للتانية احسن تشوف في عنيها نظرة يلا نروح نقعد في اي مكان نتكلم وخلاص

وصلنا للمكان واول ما دخلنا حسينا احساس تاني .. الموضوع بجد والناس فرحانة واحنا اسمنا كُتاب
انتي كاتبة ؟! نعم !!! .. ممكن توقعي لي
الناس كلها مبسوطة، الناس كلها حلمها بيتحقق واحنا الوحيدين اللي واقفين تايهين او مش مستوعبين وفكرنا نمشي اكتر من مرة !

هنقول كلمة ؟! هينادوا الاسم وهنقوم ؟! طب لو اتكلمنا هنقول ايه ؟!
مش انتي من المشاركين ؟ تعالي سجلي كلمة في دقيقتين بس

مش عارفة ليه لأول مرة يبقى موضوع الكلام ده شاغلني ومش عارفة ازاي فكرت اني ممكن اتكلم فعلا، الناس كلها اتكلمت عن موهبتها اللي اهلها واصحابها حسسوها بيها ونموها بتشجيعهم وكتير منهم شكر اصاحبه واهله اللي حضروا اليوم
بس  انا لما فكرت في انا ممكن اقول ايه .. لقيت ان في ناس هشكرهم على الكتابة وفي ناس هشكر الكتابة عليهم

هشكرها عشان عرفتني على ناس من احسن الناس اللس قابلتهم في حياتي واللي كانت مقابلتهم من سنة ونص تغيير كبير بالنسبة لي غير الناس اللي قابلتهم امبارح كمان
وهشكر الوجع اللي كنت فاكراه نهاية الدنيا واكتشفت انه كان بداية جديدة ليا في حاجات كتير جدا منها الكتابة اللي كان هو سبب رئيسي واساسي في اني اتجه ليها
وفي لحظة بعد ما كنت مش حاسة بأي حاجة بدأت احس بالانجاز الصغير الغير مقصود اللي اتحقق وبدأت افكر في اللي وصلتله من سنتين لدلوقتي واللي يمكن في ظروف احسن واسعد مكنتش وصلت ليه

وافتكرت ان everything happens for a reason حتى الحاجات اللي بنعتبرها اسوأ حاجة ممكن تحصلنا في وقتها .. امبارح كان انجاز من الانجازات الصغيرة والكبيرة اللي بحققها من سنتين فاتوا واللي هفضل اشكرك عليها دايما

عن انجازات اليوم 
قابلت رضوى وناس تانية كتير 
قابلت رنا ورغينا كتير جدا جدا جدا واشترينا كتب في الاخر او بمعنى اصح هي جابتلي كتاب "محال" ليوسف زيدان هدية 

شكرا لكل واحد شارك بفكرة او بمجهود او بكلمة في نجاح اليوم امبارح .. اسفة لكل واحد جه كلمني ومكنتش مركزة او مستوعبة هو بيقول ايه واسفة كمان لو مكنش باين عليا اني مبسوطة بس انا فعلا كنت فرحانة بالجو واليوم والناس جدا، شكرا مرة تانية وتالتة ومليون 

هناك 6 تعليقات:

  1. ^_^
    انا تعليقي هو اللاتعليق

    خلص الكلام

    ردحذف
    الردود
    1. معنديش اي حاجة اقولها على الاطلاق :D

      حذف
  2. :)
    والله انتوا كنتوا احلى حاجة ف اليوم يا بنات

    ردحذف
    الردود
    1. والله انا مبسوطة اني شفتك جدا اصلا :))

      حذف
    2. نور فاكرة تعلقنا على راء بعد ما ماشيت

      احنا الاتنين كان عندنا نفس التصور

      كنا فاكرينك اطول من كده بس في بصه شريره منى ومن نور ادركنا برضوا انك طويله عننا عادى يعنى حقد دفين :D

      وانا مش حاسبه اليوم دة زى ماقلتلك الا لما نتعرف اكتر زى ما قلتلك :)

      يا هاربه

      حذف
    3. ايوه تقريبا اكتشفنا ان المشكلة فينا وانا مهما كان طول اللي قدامنا فبرده هيفضل اطول :( :D

      حذف