الأربعاء، 25 ديسمبر 2013

الكلمة الطيبة .. فقط


حاول ماتوصلش اللي قدامك انه يجيب اخره معاك .. في اي حاجة، الطيبة المسامحة التقبل التعب الحب وحتى الكره، دايما سيب بينك وبين الأخر خطوة حتى لو صغيرة .. ربنا يحميك شر حد جاب اخره خصوصا لو كان بيحبك اوي
انا ؟! انا جبت اخري كتي, لما جيت على نفسي كتير اوي وتعبتها في عمل المفروض انه خير والمفروض اني ماوصلش للمرحلة دي فيه وان كان المفروض من الأول اعرف اقول مش هقدر لو فعلا مش هقدر ومش فاضية لو فعلا مش فاضية واعترض على اللي مش عاجبني من اول مرة
وجبت اخري معاها لما حاولت اقول كذا مرة ان ده غلط وده ماينفعش وده هيتعبك بعد كده وكل مرة كانت المناقشة تقلب خلاف لحد ما قررت ابعد واتفرج من بعيد
احنا مش ملايكة ومحدش بيفضل يحاول ويحارب طول عمره، كلنا بنوصل لمرحلة من مراحل اليأس .. يأس من المحاولات يأس من الكلام يأس من الآخر بشكل عام واستسلام بالأمر الواقع المرفوض والمعترَض عليه دايما من كل الاطراف

في طاقة مهدورة في مكان ما انا مش عارفاه ولا عارفة هي بتعمل ايه هناك ... طاقة التعامل مع الناس عندي بقت قليلة جدا، فكرة اني امسك التليفون واتكلم وافتح نقاشات دي بقت شبه معدومة وفكرة اني اكتب حاجة على فيس بوك او تويتر واتابع التعليقات و ارد على واحد واحد دي بقت مستحيلة مش عارفة ايه وصلني لكده بس فعلا بحاول ارجع ومش عارفة .. بقيت اكتفي بالمقابلات الشخصية وبكون متواجدة فيها معظم الوقت مرعاة لترك شيء من التواصل بيني وبين الناس بعد ما بعدت عن كل حاجة تقريبا حتى موبايلي اللي مش عايزة اصلحه ولا اغيره .. بقيت مش متحملة عتاب من حد، على قد ما بيبقى احساس حلو جدا ان الناس تحس بغيابك وتسأل انت فين على قد ما ساعات ببقى نفسي ابعد وادخل عزلتي من غير ما حد يلومني على اني مش بسأل او مش بتكلم او مش موجودة او حتى يسأل مالك ويمكن ده سبب من اسباب فتور العلاقات اللي انا فيه .. الناس بتوصلك ساعات لمرحلة انك هتسأل عليهم واجب او بمعنى اصح عشان مايضايقوش لكن مش عشان انت حابب انك تعمل كده

هناك 5 تعليقات:

  1. في طاقة مهدورة في مكان ما انا مش عارفاه ولا عارفة هي بتعمل ايه هناك

    انتى بتفوقينى بكلامك دة

    انا حاسه انى صرخت من الوجع بس متاخر اوى

    متاخر اوى يا نور

    ردحذف
    الردود
    1. مفيش حاجة اسمها متأخر .. المهم انك قدرتي تصرخي وتطلعيه

      حذف
  2. أحيانا في ناس بتجيب أخرها من غير سبب معين ..بتبقي مستنيه أي موقف أو غلطه لحد و تتلكك لمجرد أنها تفرج عن الضغوطات اللي حوليها علي أي حد...و ده يمكن بسبب أن مبقاش الناس تسمع لمشاكل بعضها ..الناس بقت بتحب تتكلم أكتر ما تسمع ..ساعات الواحد بيبقي محتاج من اللي قدامه أنه يسمعه بس من غير ما يديه نصايح أو فتوي أو يقوله أنت صح أو غلط ...طبعا ده بأستثناء الناس اللي مبيسمعوش نصايح حد و لو عارضيهم يبقي أنت حاجه من الثلاثه دول يا غيرانه.. يا فاهمه أنك صح في كل حاجه و البريمو اللي فيهم.. يا معقده ...و بيوصلونا لحالة الامبالاه

    ردحذف
    الردود
    1. مش هقول اني عرفت انت مين بقى وكده :D

      السطرين الاخرنيين دول لخصوا اللي عايزة اقوله بجد، موضوع غيرانة ومعقدة وفاهمة كل حاجة ده فعلا اللي بيوصلك للامبالاه بدل وجع القلب والدخول في مناقشات اخرها خلافات ومشاكل اكتر من المشكلة الاساسية نفسها

      حذف
  3. شعر بحاجه كبيره لجرعه من البكاء مره واحده في لحظة واحده تجتمع فيها كافة مشاعري واقف مع نفسي بعدها وقفه جريئه تقويني امام كل الصعاب والمأسي النفسيه التي اعيشها .
    هذا الصراع يجب ان يخرج من حياتي
    ﻻ يجب علي ان ابقى مدفونة اﻻحاسيس محبطة الافكار
    ﻻ تكترثي لمن يحاول حجزك وان يشعرك بحبه لك انت تعلمين جيدا مصلحتك وتعرفين كيف تسلكين سبل النجاح دون الحاجه لأي كيان في هذا العالم
    تذكري دوما انك أكبر من كل التفاهات التي تدور حولك في فسحة الحياة .. وﻻ تتأثري من مظاهر خداعه زائله زائفه رخيصه..



    رددي دوما :
    " انا اكبر من كل هذا "

    ردحذف