الاثنين، 13 يناير 2014

نعمة الأول


تحياتي*
لأول كسر ف دراعي .. وأول ( ... ) / لأ مافيش داعي . وأول مرة اشيل تليفون .. وأول جون .. وأول يوم قبضت فلوس .. وأول حد جابلي فانوس 
لأول حضن بعد ماجيت .. وأول مرة فيها بكيت .. وأول حاجة من مالي 
أجيبها واحُطها ف البيت .. وأول صورة لما تخِنت .. وأول مرة اعاكس بنت 
وأول رحلة علي أسوان .. وأول حفلة بالبدلة .. وأول لفه بالعجلة .. وأول شده ف سجارة .. وأول جرح ف الحارة .. وأول كارت جايلي ف ورد .. وأول عطسة بعد البرد .. وأول لمسه لايديها .. وأول بصه ف عنيها .. وأول بنت حبيتها وعامل دايرة حواليها 
تحياتي لأفضالك ياعالم كله متحوّل
عشان خلتني ف الآخر
*أحس بنعمة الأول

الكلمات دي فكرتني بحاجة كتبتها زمان عن مقولة الغيطاني عن البدايات وواللي بيقول فيها "للبدايات دائما شأن عظيم والبدايات لا تتكرر ابدأ" واللي تعتبر من افضل الجمل اللي قريتها في حياتي او فعليا هي اكثرها واقعية
فكرتني ازاي احنا لازم نفضل ممتنين لأول كل حاجة بغض النظر عن النهايات .. ممتنة لأول حد أعجب بيا واول حد أعجبت بيه .. لأول احساس صادق حسيته في قلبي لحد .. لأول كلمة حب سمعتها .. لأول واحد قالي مش هتقدري ومن كلامه قدرت .. لأول واحد قالي هتعرفي ومن ثقته عرفت .. لأول مكالمة وأول رسالة .. لأول حلم حلمته .. لأول خذلان خلاني مستقلة .. لأول صدمة خلتني اقوى .. لأول فراق عرفت بعده ان مش دي النهاية .. لأول صدفة بيننا .. لأول احساس بالقلق على حد .. أول خوف من الخطوة الجاية .. لأول هدية وأول مفاجأة وأول "بحبك" صريحة كده .. لأول مرة اكتب فيها .. لأول حد يقرالي .. لأول رواية .. لأول امل ولأول يأس وأول وأول وأول

لحد قريب كنت فاكرة جمال الغيطاني يقصد الحاجات الحلوة بس، بس بعد تفكير وتجارب كتير لقيت ان اول حاجة من اي حاجة دايما بتبقى عظيمة حتى لة كنا شايفين العكس وقتها
اكتشفت ان كل حاجة حصلت اثرت فيا بعدين واللي كنت فاكراه اسوأ حاجة ممكن تحصلي في الدنيا عرفت انه اكتر حاجة اديتني قوة اني أكمل اللي انا فيه وابدأ بدايات جديدة حتى لو لسه مانسيتوش وحتى لو وجعه لسه موجود
اكتشفت ان لولا اللي مريت بيه مكنتش بقيت هنا بكتب ولا كنت اتعرفت على كل الناس دي وكان موضوع التطوع هيفضل حلم بالنسبة لي
اكتشفت ان اسوأ حاجة في الدنيا اننا نقعد نبكي حظنا ونقول ياريت لحد ما نفوق فجاة نلاقي مر سنين واحنا لسه مكانا ماتحركناش خطوة في الوقت اللي كل حاجة حوالينا مكملة دوران في مدارها

مش كل البدايات مرضية ومش معنى اني ابدأ بداية جديدة عشان بس اعرف أكمل حياتي ان انا كده مبسوطة ونسيت اللي فات، مش مهم تكون ناسي ومش مهم تكون سعيد في المرحلة دي بس الأكيد انك لازم تبقى عارف انك في خطوة جديدة وانك على الأقل مش واقف مكانك وان البدايات مهما كانت فهي خطوات صغيرة في طريقك لنفسك ولحلمك
الكلمات لعمرو حسن*
الصفحة الرسمية