السبت، 25 أكتوبر، 2014

تناتيف

-عادي كلنا بنغلط
انا مرة كنت بحب واحدة واحنا في الجامعة، كنت متخيل بقى الحب الافلاطوني ده حب الحياة، وبعد ما اتخرجنا بشهرين تلاتة، اتجوزت اول واحد جاهز .. عادي اكيد بنختار حد غلط في حياتنا يعني
-ايوه بس انت كده ما اختارتش غلط ظروفك هي اللي كانت وحشة
-انتي عارفة ان انا ضحكت على نفسي بالجملة دي لحد ما صدقتها، يعني مثلا وانا صغير كان نفسي اطلع لعيب كورة كبير ومشهور مع ان عمري ما عرفت العب كورة، حتى بعد ما خلصت ثانوية عامة ودخلت جامعة مش قد كده وقعدت اشكي حظي واقول اشمعنى انا مع اني برده عمري ما ذاكرت بجد
لعلمك في ناس كتير ظروفهم اوحش مني بس حالهم احسن مني .. يعني مابيرموش كل حاجة للظروف

-مش شايفة ان خمس سنين كفاية عشان نبدأ علاقة جدية
-انا شايفة ان خمس سنين كفاية عشان ننهي العلاقة الهزلية دي
هشام من الناس اللي بحب الخروج معاها جدا، رغم انه اقل حد ممكن اكون بتكلم وانا معاه، بروح عشان اسمعه وعشان اعرف خططه الجديدة اللي عمرها ما كملت .. بحب اسمع كلامه على اصحابه الولاد والبنات واستمتاعه بحياته رغم كركبتها، هو اصلا شخصية مكركبة ويمكن ده المختلف واللي مخليني احبه جدا، بحب فكرة انك تبقى ماشي مع حد مش متوقع منه ايه الخطوة الجاية، زي اننا نبقى بنتمشى وتيجي بنت فجأة تصوت وتسلم عليه وتزعل انه موجود في الزمالك وهي ماتعرفش او اننا نبقى قاعدين في صوفي وكله بيهمس وفجأة نقول حاجة تضحك فينسى كل حاجة ويضحك بصوت عالي يخل بأبسط قواعد المكان او انه يقرر يتصور سيلفي في محطة مترو او يسألني مش هنرتبط بقى اقوله لأ فيقف في وسط الشارع ويقولي يعني بترفضي ؟! فميبقاش قدامي اي حاجة غير اني اضحك واسيبه وامشي !
كل مرة بشوفه وانا مقررة اني هنسى اي حاجة مضيقاني لمدة ساعتين او تلاتة وكل مرة هو يساعدني في كده من غير ما اتكلم، مش عارفة اذا كان بقصد او من غير بس المهم انه بيعرف يعمل كده رغم انه ممكن يكون عنده اللي مضايقه اكتر مني
كتير بحس انه ابني واني بتمناله النجاح زي ما بتمناه لنفسي ويمكن اكتر وببقى فخورة بيه جدا لما بيكتب حاجة كويسة وتعجب الناس او لما يحقق جزء ولو صغير من خططه وطموحاته اللي مابتخلصش ولما اكون معاه ببقى حاسة اني مسؤولة عنه ويمكن عشان كده بزعل منه اوي لو شفنت انه غلط .. وكتير بحس انه اخ او صاحب وقت ما اكون متضايقة وكله مقفل الاقي رسالة بتقول يلا نتقابل فيبقى الرد يلا او صباح الخير ويبقى الرد الطريق زحمة وانا متأخرة فيرد بوردة تخليني ابتسم وانا في اتوبيس الشعب البائس .. الصاحب اللي ممكن اقابله في حالتي المزرية بعد 10 ساعات شغل واللي بكون فيها شبه طالب ابتدائي خارج من المدرسة بعد 8 حصص اخرهم ألعاب واللي ممكن اقوله احنا في اخر الشهر مفيش فلوس فنكتفي اننا نتمشى وناكل ايس كريم
حالة انا بحبها بكل ما فيها، الصح والغلط والعقل والجنان ومؤمنة بموهبته جدا ومتأكدة انه لو ركز فيها هيعرف يوصل لأكبر من اللي بيحلم بيه

امبارح رحت حفلة في الساقية لواحد معرفوش بس رنا بتحبه، رحت معاها عشان بس اشوفها واشاركها فرحتها بأول مرة تحضر حفلة نفسها تحضرها من زمان .. رنا معرفتي بيها تقريبا ماتزيدش عن 3 سنين شفنا بعض فيهم مرات معدودة وده اللي بيخليني استغرب ازاي كل مرة اكلمها او اقابلها احس اني ببص لنفسي في المراية بالشكل ده .. الوحيدة اللي بقولها الكلام اللي بقوله وافكر فيه مع نفسي قبل ما انام ، الوحيدة اللي بكلمها وانا متاكدة انها هتفهمني صح ومتاكدة اني لو اتكلمت 3 ايام متواصل هتسمعني بنفس الاهتمام بتاع اول دقيقة، بحس ان دي موهبة ربنا واهبهالها، طاقة تحمل مش موجودة عند كتير مننا .. عمري ما قابلتها وسبتها وانا مخلصة كلامي وعمري ما كلمتها في مرة وخذلتني وعمرنا احنا الاتنين ما قدرنا نوصل لتفسير التشابه الفظيع اللي بينا .. ساعات بحس انها هدية من ربنا، هدية بتجيلي كل شوية عشان تخفف من عليا كتير واخرج معاها شوية طاقة سلبية من المحبوسين جوه احس بعدهم اني في وزن ريشة
رنا ما ينفعش يتكتب عنها، ماينفعش تتحبس في شوية سطور، هي اصلا شبه العصفور اللي حتى لو تاه او جناحه تعب شوية هيفوق وهيعرف يكمل طيران
باعترف اني كنت رايحة الحفلة عشانها بس باعترف دلوقتي ان اتبسطت اكتر منها، اتفاجئت بمها هناك اللي عنيها رجعت تلمع تاني من الفرحة والسعادة واتفاجئت بزاب ثروت وشفت محمد ابراهيم ودلوقتي انا مدينة لرنا بشكر غير محدود على يوم من الايام العظيمة اللي ربنا بيقولك بيها "انت لسه قادر تفرح رغم كل شيء"


هناك تعليق واحد:

  1. احم احم هعلق تاني واحاول اتذكر تعليقي الاولاني
    هشام بالنسبه ليكي متمثل في جزء من طموحك وافكارك في السن دة
    والحماس دة رابطه نفسك بيه علشان جزء منك يفضل متجسد قدامك
    انا كمان بحب اعرف النوعيه دي من الاشخاص اللي بشوف رنا فيهم في سن معين
    كانت عامله ازاي ومليانه حماس ازاي

    مقطع الفيلم كان اهم مقطع بنبرة وتون كريم عبد العزيز اللي خلتني اعيط جدااا

    انا عن الحفله انا اكتر حاجه مقدرها انكم اتفقتوا تعملوا دة علشاني انا في حد ممكن يتعب علشاني ويجي يحضر حاجه
    ويكلف نفسه كمان :*

    مفاأجتك كمان انا قابلتها باقل من الحماس المعتاد انا مكنتش مصدقه ان دة حصل فعلا
    نور انتي نوري اللي بينور دايما وسط عتمه حاجات كتير اوي
    مقابلتك بتفرق بتفرق جدااا :*

    انا بحبك اوي <3

    ردحذف